O le agaga o le Kirisimasi o le foai lea o meaalofa mo e pele i le aiga, loto ma le ekalesia. O se tasi o uiga matagofie o le soifuaga aemaise le faakerisiano i vaitau nei o le Kirisimasi.
O le agaga lenei na a‘e ai se tofa i le ekalesia Grace Point o loo galulue ai le susuga Ps Vili Aufa‘i ma le faletua ia Josie Aufa‘i aemaise le paia ma le mamalu o le aulotu e galulue ma le Fono Aoao a Tagata Samoa i Sini ‘ia faasoa lenei agaga o le loto fesoasoani ma le alofa’ i nai o tatou tagata faapea le lautele.
O le anoanoai o taumafa tuuapa, falaoa, masi keke ma pani aemaise le susu, fruits ma vaiinu avefua na mataina ai lenei galuega alofa.
O sui o le Fono na auai atu e aofia ai le Peresetene, Afioga Faumuina Lisa Parker le sui Peresetene faapea le Failautusi afioga Tuioti Ruta Tonumaipe‘a ma lona alii le afioga Toleafoa Tonumaipe‘a.
E ui na faasalalauina i luga o leitio Samoa i Sini ma le nusipepa lenei aso ‘fiafia’ sa tatala foi le avanoa i soo se tasi lava o le aai ma le pitonuu e moomia le fesoasoani i meaai ma le taumafafua.
O le susuga lava foi ia Ps Vili Aufa‘i ma le Komiti Faamoemoeina le susuga Palemia Alaalatoa le sui muamua o le Manu Samoa ma le susuga a Iputau Imo ma nai tamā ma tina sa faasoaina tiute o le aso.
O nai nisi o aiga na tau atu loa amata i le BBQ sosisi faatoa ta‘ape ai tamaiti i taaloga na saunia mo i latou e pei o Jumping Castles.
Sa lē motu foi le taumafaina o fualaau‘aina e pei o apu, nectarines, apricots, fa‘ipula, moli ma faagasolo atu ai mātua e siaki fua e aunoa ma se totogi le toto maualuga, ma‘i suka faapea fautuaga i le soifua maloloina ia Dr Olataga Alofivae ma Dr Kamal Doorbinnia.
Sa latou galulue foi ma nai tamaitai fomai (RN) e toalua sa fesoasoani ai o Louisa Perese ma Peleiupu Tautua. O isi sui o le Komiti e aofia ai Imo ma le faletua ia Theresa Iputau, Helen Fepuleai, Toleafoa ma Loto Unasa, Elisa Talisau ma le Faifeau ia Ps Kalati Perese.
Sa matuā vaaia foi le sagisagi fiafia i o latou tiute alo o le faifeau ma le autalavou i le taligamalo i lea aso.
I totonu lava o le malumalu na saunia ai foi se faatalanoaga ma nisi o le atunuu ma soo se tasi o loo iai ni atugaluga ma faafitauli masani o lenei olaga ma faia ai se tatalo mo nai o latou aiga.
Sa sausauina ai foi nisi na afifio atu i le ‘Suauu Paia’ (The Holy Land Anointing Oil) na malaga mai ma Ps Vili Aufa‘i faapea Ps Mafi Mataafa mai Ierusalema.
O le isi tulimanu na faapitoa mo nai tina auā le teuina ma faaiila o latou atigilima faatoa vali ai (manicure) o se avanoa lelei foi lea sa faasoa ai i latou i aluga o le soifuaga ma le mafutaga ma le Atua.
Sa lē gaogao lenei auaunaga i le aso atoa ma o le molimau a tina, o le pisi lava i aso taitasi ma leai ai lava ma se avanoa e teuteu ai atigilima. O le tasi vaaiga fiafia o le taaalo fiafia o le fanauiti i le Jumping Castle i le aso atoa ae agai atu mātua mo auaunaga na saunia.
E lei malolo lava le BBQ sosisi i le aso atoa faapea le afea e nisi o tagata feoai o lenei ‘Aso Fiafia’ i pepa faailo na tutū ma sui o le komiti i le auala.
O le taimi na tuumuli ai aiga ma tagata na afea le ‘Aso Fiafia’ na ave ai foi ma a latou ato ma pusa meaai eseese e faaaogā i lenei vaitau a o agai atu i le Kirisimasi.
Saunoa Ps Vili Aufa‘i, o le agaga lava lea o le Faaola ia Iesu Keriso, o le faia o galuega lelei ma le alofa i soo se tagata aemaise i le lalata mai o le Kerisimasi. I tagata o isi atunuu sa afifio atu ua o latou faailoa le agaga faafetai ma le faamanū i lenei fesoasoani mo o latou aiga.
O nisi o ulugalii talavou faatoa taunuu i Sini nei mai Niu Sila na avea lea aso ma faaolatotoga i le tele o taumafa na tali ai le sua aemaise le tele o pusameaai ma vaiinu, susu ma fualaau‘aina na tufaina. O se vaitau o Mati poo Aperila i le tausaga fou ua sauni ai se isi faamoemoe faapenei.
