Ua toe tapena atu nei le ‘au taitoafitu a Malisi i Aukilani e puipui lana siamupini ile taamilosaga taitoafitu a Malisi i Samoa e faataunuuina ile faaiuga o Fepuari.
Ole tausaga ua mavae na sola mai ai le 7 a Malisi i Aukilani ma le siamupini o lea taamilosaga ae o lea foi la ua toe sauni atu e puipui lana Ipu ina ia faamautu ai pea le avea o lenei ‘au ma siamupini ole taamilosaga i Samoa.
Ae ole tele ma le lelei o nei sauniuniga ma tapenaga mo le ‘au, ole lelei ma le lagolago malosi o nisi o tamafanau a Malisi oloo i Aukilani, oloo mafai ona tuu atu lo latou tau‘au e fesoasoani ai i tapenaga mo le malaga atu ole ‘au i Samoa.
Ole afioga ile aloalii ia Galumalemana Tai Galumalemana ma le auaunaga ale faletaavale ole G-Mana Wholesale Autos, ole Sponsor autu lea mo le ‘au a Malisi, ua latou tauaao atu nei se fesoasoani tupe ile pulega ole ‘au a Malisi e $12,000 e fesoasoani ai i tapenapena ale ‘au.
E $8,000 ua tuuina atu ile pulega e fesoasoani ai mo le faamoemoe a Malisi ile Aso Faraile ole vaiaso nei, 10 o Fepuari lea ua tapena ai Malisi e faamavae atu ai ile ‘au ua filifilia ele pulega, auā le puipuiina ole Ipu i Samoa, ma ole po foi lea ole a fofogaina ai le lisi ole ‘au.
E $4,000 le tino i tupe na tuuina atu ile afiafi ole Aso Tofi ele alo ole afioga ia Galumalemana Tai Galumalemana, le alii o PJ Galumalemana ile pulega ole ‘au, auā isi fuafuaga ale ‘au mo Samoa, ma o lenei faatasiga sa auai le afioga ile Konesula ia Faolotoi Reupena Pogi ma nisi ole komiti ole ‘au a Malisi, ile maota o Samoa i Magele e talisapaia le aao mafola ole G-Mana e pei ona tuuina atu mo le ‘au.
Ole afioga ile taitaifono ia Vui Leota Isaako na ia faia le saunoaga faafetai ile afioga ile aloalii ma lana auaunaga, e tusa ai ma le seleni sa tauaaoina. Ma ole po foi lea sa faailoa aloaia ai le igoa ole ‘au a Malisi lea ua faaigoaina ai mo le taamilosaga i Samoa, ile G-Mana Marist Auckland.
O nisi o kamupani oloo lagolago foi ile tapenaga ale taitoafitu a Malisi, ole Pacific Ezy Money Transfer, Talimanao, PFL ma le Shop Samoa.
