E afua atu i le Aso Lua 22 o Iulai 2014, ua toe 40 nei aso ona taunuu lea i le aso e amata ai ona usuia i Samoa le fonotele a malo laiti o le lalolagi ae ua vaaia e lē o solomuli nisi o malo o loo avea ma paaga vavalalata a Samoa i fesoasoani ua tuuina atu mo le taligamalo a le atunuu ona o lea fonotaga.
O Iapani lea ua latou tauaao atu i le taitai o le Malo le afioga i le Palemia lana foai o pasi e 20, i le tuanai o le masina na tea nei na tauaao ai le foai o pasi e 15 mai le Malo o Saina. O le autu o nei foai o le feaveaiina o malo ma usugafono o le a malaga i Samoa mo lea fonotaga tele faavaomalo.
O le Amapasa o Iapani i lo tatou atunuu o Kazumata Shibuta na ia tauaao atu pasi e 20 i le taitai o le Malo le afioga i le Palemia susuga Tuilaepa L Sailele Malielegaoi, ma lana saunoaga o Samoa ma Iapani ua matua mafanafana ma vavalalata ona sootaga e lē gata o atinae eseese ae o upufai o Malo.
E pei ona silafia e lo tatou atunuu, tasi lea o Malo ua loa tausaga o tatou galulue faatasi ma ua faulalai le tele o ana fesoasoani i le atinae o Samoa, e lē gata o le tulaga i vaa feoai o le sami e pei ona iai vaa laupasese i le va o Upolu ma Savaii ma malaga i Amerika Samoa, ae ua latou fausia foi ma faaleleia uafu. O le Iunivesite aoao a Samoa sa faatupe foi e Iapani, le taligalu tele o loo taamilo i le gataifale o le taulaga o Apia, faapea ana fesoasoani i le fausia o falea‘oga, le aumai o tagata ua iai tomai faapitoa o lo latou atunuu e galulue fua i Samoa poo volunteers, ma le anoano o ana foai i faalapotopotoga tuma‘oti ma pisinisi.
Le kamupani o le Yasaki i Vaitele tasi lea pine faamau o le mafutaga lelei a Samoa ma lea Malo auā o lea kamupani o loo gaosia uaea o taavale ma faatau i kamupani i fafo e pei o Ausetalia o loo gaosi ai taavale o fausaga a Iapani.
O pasi e luasefulu lea ua foai mai mo Samoa auā lana taligamalo e 894 afe tala Amerika lo latou tau tuufaatasi, lona uiga e silia i miliona tala Samoa pe a faatupe ia tatou seleni. Peitai o le lē lava o le faasoa a le Malo ua mafua ai ona tapatapa ia Iapani mo se laveai lea ua aumai ai pasi.
E faapena foi pasi e 15 na foai e le Malo Saina ma nisi o taavale laiti mo le feaveai ai o malo faaaloalogia o le fono. O Saina foi latou o se uo mamae a Samoa ma ua lasi foi ana fesoasoani i le atinae o le tatou atunuu.
O le upu moni lava ia, pe ana leai le agalelei o Malo mai fafo ile atinae o Samoa, tatou te lē mafai ona ausia nisi tulaga lelei ia tatou fuafuaga fai i le va nonofo ai ma isi malo mauoloa i fafo.
