E $10 afe tala le aofai o se fesoasoani ua foai atu e le ofisa o Amerika i Samoa nei mo lana tulimanu i le faletusi o Nelesoni i Apia i tua ane o le uati.
O lea fesoasoani o se sao lea o le Ofisa o Amerika i le faamanatu ai o lenei vaiaso atoa mo faiaoga o Samoa.
O tusi ma isi meafaigaluega ua faapea ona ofo atu i lalo o lenei fesoasoani ma le faamoemoe o le malo o Amerika, ina ia faalautele pea lana fesoasoani i le atinae faaleaoaoga o fanau a Samoa.
O le tulimanu lenei ua faaigoaina o le tulimanu a Amerika i le faletusi, ua iai computers ma ua mafai ona fesootai fua ai soo se tagata e faaaogāina le faletusi i fesootaiga tau internet.
E le gata i lea ua tele tusi fou aemaise o faamaumauga e faaaogā i suesuega e faatatau lava ia Amerika ua maua ai i lea nofoaga. O se tasi o vaega e tumutumu ai lava le toatele i le faletusi lea e i Apia.
O se fesoasoani tele lenei e pei ona ta‘ua e le faletusi o Nelesoni i le faaauau ai o le auaunaga lenei o le ofo atu o tusi faitau aemaise o faamaumauga i suesuega faaleaoaoga ma le taumafaiga lava a le lautele ina ia maua ni tusitusiga fou ma ni fesootaiga fou ma lea malo tele. Ua lua tausaga talu ona faatū lea vaega o suesuega i le faletusi o Nelesoni i Apia.
