O suaga a le vaatele, o faautugatagi, o le fia saili malo ma le fia finau lea ua taufaoina ai ni avanoa ma ni taimi o le taitai o le malo Niu Sila, le afioga i le Palemia Toosavili John Key e faasao atu ai ma faaoo atu ai le mau manaoga, o manaoga o tagatānuu o le Pasifika ina ia matuā lagonaina mai e le taitai o le malo, a o lei oo atu i le taimi o le filifiliga faitoatasi a le tagata lava ia e ave ai lana togi i le pati poo le faigamalo e talitonuina o le a mafai ona tali mai e tusa ma manaoga faataatitia auā lava ni manuia mo tagatānuu lautele, e pei ona ua lomaina nei mo le masina o Setema.
O le taeao o le Aso Lua o le vaiaso ua mavae atu nei, na matuā faatumulia ai le maota o le Ekalesia Aso Fitu i Magele i le paia ma le mamalu o Samoa potopoto e afua mai i taitai o Ekalesia eseese, o faauluuluga ma pulega o le au faipisinisi Pasefika, o tuaa o Samoa i tina ma tamā matututa, o tupulaga talavou e oo lava i alo ma fanau sa auai atu ma fia faafofoga i le saunoaga aloaia a le Palemia e faamautinoaina ai ma faamautuina ai lona faatāuaina, lona amanaiaina, lona taliaina ma lona manatu mai e na te lagonaina mai ai leo o tagata Pasefika i Aotearoa nei auā ni ‘ai lelei pe a fai e manumalo mai i le palota.
O le tofa alualu mamao ma le faautaga saili i le loloto o nai o tatou tagata mo se lumanai manuia o tagata lautele ae faasilisiliina ai le vaai mamao mo alo ma fanau mo a taeao.
O le aso foi lea na faailoa aloaia atu ai e le susuga ia Teleiai Edwin Puni i le alii Palemia ma lana faigamalo, anavatau a le Pacific Collective Network lea o loo taulamua nei i le taumafaiga ina ia logologo puialii atu i o tatou tagata, le tāua ma le tatau ona unai ma iai o ni sui se toatele o tagata Pasefika i totonu o le faigamalo a le National.
O le faamoemoe maumaututu ma le faavae o nei fonotaga ma mafutaga e faatinoina, ina ia silafia ma le mautinoa e le taitai o le malo, e lē o toe nofoai tagatānuu o le Pasefika aemaise lava mo lo tatou atunuu, auā ua faasee lava lo tatou sa ma unaiina atu ai ni o tatou sui ua tatau ona ofi atu i le faigamalo, latou te faaleoina o tatou manaoga ma tauiviina tulaga uma e mafai ai ona faamanuiaina tagata lautele o le Pasifika.
O le saunoaga a le Palemia afioga Toosavili John Key na ia faatāuaina ai le soifua tauivi ma le sogasogā tauivi o tagata uma. Ia matuā unaiina alo ma fanau i aoga e afua mai lava i aoga amata ina ia lelei ma mautu le faavae mai o le ola aoaoina o le tamaitiiti seia oo atu ai lava ina ausia aoga maualuluga ma avea ai o ni tagata latou te agaia le malo i le lumanai.
O le faamoemoe foi ina ia faatupulaia pea le fuainumera o sui o tagata Pasifika e autovaa atu i totonu o le faigamalo. O se mafutaga na matagofie ma aloaia lelei lona faataunuuina auā, na maofa le alii Palemia aemaise o le sui faatu mai o le itumalo o Magele mo le National Party, le afioga ia Misa Fia Turner ona sa maitauina ma le loto fiafia le taupati atu o le paia ma le mamalu o Samoa na mafai ona auai atu e lagolago i le tulai mai o lea foi sui auā le faiga filifiliga e pei ona loma nei.
E faamoemoe o le a tatala le tofa ma tafa finagalo o nai o tatou tagata ina ia silasila ma tagai mamao auā lava alo ma fanau lalovaoa mo a taeao, aemaise lava foi o tagata lautele ina ia tutusa ona agavaa i fuafuaga a le faigamalo.
Ia a o le faiga lava o lau togi mo le sui ua e talitonuina o lau lava lea filifiliga fai toatasi, o lau togi foi mo se faigamalo talafeagai lelei mo se lumanai manuia o tagatānuu uma o Aotearoa o lou lava foi lena lagona ma lou talitonuga faitoatasi.
Ia talosia le faiga filifiliga a lenei atunuu ua tatou aumau ai, ia faataunuuina i le manuia ma le alofa mai o le Atua ina ia mafia ona maua ma filifili ni sui lelei ma alolofa, aemaise foi o se faigamalo e faatāuaina soo se tagata i totonu o Niu Sila nei.
