O le finauga lea na folasia i luma o le Faamasinoga Maualuga i Mulinuu i le faaiuga o le vaiaso. O le taumafaiga lea a le loia a le Faifeau Toeaina Faatonu lea ua aveese ona tofiga Toeaina ma le Faatonu e le Ekalesia.
O le mataupu lenei ua oo i le faamasinoga ona o le faaiuga lea a le Ekalesia ia Rev. Kereta Reupena.
O le talosaga a le Itu Tagi ona e lei iai ma se leo o le alii faifeau e tali atu ai i le faaiuga ua faia faasaga ia te ia atoa ai ma isi vaega o faaiuga a le lotu ua ia manatu ua lē tusa ai ma faavae a le Ekalesia.
O le finauga na tulai mai ina ua folasia e le loia o loo tulai mo le Ekalesia, o Tima Le‘avai e lē mafai e le alii faifeau ona ia ave le Ekalesia Aoao i le tulafono ona o loo i le faavae o le Ekalesia o le EFKS e lē o se tino e mafai ona ave i le faamasinoga. O loo i lalo le Ekalesia i le Fono a Faatonu a le Ekalesia (Board of Trustees).
O lona uiga o le fono lea e tatau ona ave i le Faamasinoga lea e aofia ai le Taitaifono, Sui Taitaifono ma nisi o sui o le Komiti a Faifeau Toeaina. O komiti nei e lua o le Fono a le Autoeaina ma le Komiti o Toeaina Faatonu o loo ua aofia foi i le tagi lenei ae o le Itu Tetee muamua lea ua mafua ai lea finauga.
O le mau a le loia a Rev. Kereta Reupena, le tamaitai loia ia Leulua‘ialii Olinda Woodroffe, o lea ua mae‘a ona faitau i le Faavae o le Ekalesia ma o lona malamalamaga e mafai ona fai le tagi faasaga i le Ekalesia Aoao.
O lea la na tuu atu i le loia a le Ekalesia Tima Le‘avai ma Lealiifano Dr Iopu Tanielu e avane se faamaoniga o le mau e lē mafai ai ona ave i le tulafono le EFKS.
O le mae‘a o le malologa na agai ane ai loia ma sa iai se pepa faamaonia o le lesitalaga o le Ekalesia ma na ta‘ua e le alii Faamasino Sili le Afioga Patu Tiavaasue Falefatu Sapolu, e lē mafai e le lesitala lea ona faamaonia pe mafai ona ave le ekalesia i le faamasinoga pe leai, ma e tatau ona avatu le faamaoniga lea a o lei faagasolo ni iloiloga e ono faia o lenei mataupu.
O le susuga Rev. Kereta Reupena o loo tumau ona tofi Faifeau Samoa lea o loo ia vaaia ai le aulotu a Ipswich ae o le Pulega a Kuiniselani sa faifeau toeaina ai ma le Matagaluega a Kuiniselani sa Toeaina Faatonu ai o tofi ia ua aveesea.
