“E lei maua le Tutoatasi o Samoa i le mauga o Vaea, o Tiafau na lipoi ai upufai o le atunuu, ma o Samoa e faavae i le Atua”
Ua toe lua vaiaso o loo totoe o lenei masina ona taunuu lea i le masina o Iuni e faagasolo ai le polokalame masani o le faamanatuina o le atoaga o le 52 tausaga o le Malo Tutoatasi o Samoa. O le 50 tausaga ua mavae o lenei aso faamanatu tāua o le atunuu e masani lava o le lotu i le malae o Tiafau i le aso muamua o polokalame o le Sisigafu‘a e tapuai faatasi ai le atunuu.
E ese mai lava le lotu lea i le sauniga lotu e talosia ai le Sisigafu‘a e faia i le Aso Sa a o lumanai polokalame o le Tutoatasi. O lea ua lua nei tausaga talu ona tuanai le faailogaina o le 50 tausaga o le malo tutoatasi lea sa faatino ai foi le sauniga lotu i le taeao o le uluai aso o sauniga uma, peitai o le tausaga ua mavae i le faailogaina o le 51 tausaga e lei faia se sauniga lotu, ae na ona toai taunuu lava o le afioga i le Ao Mamalu o le Malo ma lana masiofo ma malo valaaulia, faasolo loa le polokalame i le sisiina o le fu‘a, o le malelega faamanuia a le Ao o le Malo, ma savali faaaloalo.
O le tausaga nei e lē o iai foi se sauniga lotu i le malae i Tiafau i le polokalame ua faailoa e le komiti o tapenaga ma le Malo. O le auala lea o le siisii o finagalo o le vaega faaupufai o le Tautua Samoa ma ave se fautuaga malosi a le sui taitai le afioga Aeau Peniamina, i le Palemia susuga Tuilaepa Lupesoliai Sailele Malielegaoi, ina ia toe faaofi le sauniga lotu i le polokalame. “O le isi lea suiga ua matuā lē fetaui tele, o si a‘u uo (Palemia) o se tagata ua masani tele i mea faapenei nei ae ua ou lē iloa lava pe aisea ua aveese ai le vaega tāua lea o le polokalame”.
O le mau a le Malo o le sauniga lotu o le Sisigafu‘a o loo fai i le maota tatalo i le mauga o Vaea, o le sauniga aloaia lea o le Tutoatasi ma o le mafuaaga lea o le leai o se sauniga lotu masani i le malae i Tiafau lea na amata i le Tutoatasi o le tausaga ua mavae. “O Samoa e faavae i le Atua, a o lea ua aveese le sauniga tāua lea”, na saunoa ai Aeau i se feiloaiga ma tusitala.
O le suniga lotu o le atoaga o le limasefulu tausaga o le Tutoatasi i le tausaga e 2012 sa lagona ai leo o le lē fiafia ona o le umi naua o le sauniga lea toetoe lava atoa le itula o faagasolo. E iai le talitonuga o nisi sa fesiligia atonu o le isi lea mafuaaga o le aveesea o le sauniga lotu lea, ona o le silasila o le Malo i le taimi ma le alofa i fanau a le atunuu e alausu i le taeaopo mo le latou savali ma le tulai faaaloalo. E lei aumaia se finagalo o le Malo i le mataupu lenei ua laga e le Tautua Samoa.
