Finau tausi soifua e laina tutusa o latou tulaga ma fomai

O nisi o tausi soifua ole auaunaga faalesoifua maloloina in Samoa
O nisi o tausi soifua ole auaunaga faalesoifua maloloina in Samoa

Ua taoto nei le tulafono ua pasia ele Palemene i lana tauaofiaga muamua o lenei tausaga fou ua faatino ai le toe tuufaatasia ole auaunaga faalesoifua maloloina.

Ole laasaga muamua ua aiaia ile tulafono ua pasia ua faagaioia ai lea tulaga ma toe foi ai le soifua maloloina ise pulega e tasi.

Peitai e ui ua faatino ile faaiuga ole masina ua mavae ae e iai le faatulagaga poo le structure fou o lea matagaluega ua vili tiga ai lagona o nisi ole auaunaga o tausi soifua poo le nursing ina ua silasila atu ile faatulagaga fou ua taotaomia i lalo tumua’i ole tomai faatausi soifua.

Ua faaalia ese tausi soifua sinia ua aumai le faatulagaga fou ua tuu tasi uma ile tomai faafoma’i (Medical Doctor) le pulea o vaega uma ole tautua ma e lē ose tulaga e fetaui.

Faaalia ele tausi soifua ole sefulu tausaga ua mavae sa tuu eseese ai le pulea ole auaunaga faasoifua maloloina ma le matagaluega sa maioio tausi soifua ua tauaveina tulaga Pule o vaega eseese o tausi soifua peitai ua lē ole tulaga lea ua iai nei.

Ose finagalo ole Faatonu Sili aoao le tofa Leausa Dr Take Naseri na ia ta’ua ai ole vevesi lea ua aliali mai i fafo e mafua ona ole faatulagaga sa iai muamua ae ole faiga fou ole a sili ona fealofani ai le tautua faafomai ma le tausi soifua.

Ole tulafono ua pasia ua aiaia ai se Komiti o Faatonu mo le pulega ole matagaluega.

O sui o lea Komiti o Faatonu ua aofia ai Minisita o Tupe, Minisita o Faalapotopotoga ale Malo ma le Minisita ole Soifua Maloloina.

Ole Loia Sili foi ale Malo ua i totonu o lea komiti ma e ui ina tetee iai nisi o finagalo o faipule ole Palemene ae ua pasia lava le faatuina o lea komiti faatonu ma e lē o iloa pe ole a tumau pea lea komiti pe ua na’o se taimi mo le amatalia ole toe faatasia ole auaunaga ale soifua maloloina.

O totogi o foma’i ma tausi soifua ole isi lea vala ole vevesi ile faatulagaga fou ona ole mau a nisi o tausi soifua e lē o talia e foma’i le tulaga maualuga o totogi o tausi soifua oloo taiulu i vaega eseese ole auaunaga.

“E lē fou le finauga lenei ae e sili ona tele tiute ole tausi soifua mo le vaaia ma le togafitia ole gasegase nai lo se foma’i”, na talanoa mai ai le tausi soifua sinia ua lē manao e faailoa lona suafa.