O le faaiuga o le masina o Me latalata mai i le amataga o le masina o Iuni na taunuu ai i Samoa le alii lakapi ta‘uta‘ua o le aulakapi taitoafitu a Fiti o Waisale Serevi, ona o se valaaulia i le taamilosaga fitu faavaomalo o le Sisigafu‘a poo le Tutoatasi.
Sa auai foi i se faalauiloa a le vaega o loo tinou e unai le fanau laiti ma tupulaga e faamalosi le tino ma faaitiitia ai le gasegase lē pipisi e pei o le tino ua soona puta. O le taimi lea na ta‘ua na faailoa ai e Serevi lona fia maua o se avanoa e fesoasoani ai i le atinae o le lakapi taitoafitu a le atunuu.
Ua pine faamau la lea manao ina ua faailoa e le Taitaifono o le Iuni Lakapi a le atunuu le afioga i le Palemia, le talosaga atu o le alii i le avanoa o loo sailia ai se faiaogaulu ma se faiaoga lagolago o le aulakapi fitu a le Manu Samoa.
“E maualuga tele le numera o tagata lelei ua talosaga mai e to‘a 29 ma o loo iai ma le susuga Waisale Serevi mai Fiti, faapea nisi o le tatou atunuu sa i totonu o le ‘au, le susuga Tauasa Faamaoni Lalomilo, o Muliagatele Brian Lima, ma Uale Ma‘i”, o le saunoaga mai lea a le Taitaifono le afioga i le Palemia susuga Tuilaepa Lupesoliai Sailele Malielegaoi.
Faaalia foi e le Taitaifono o le iuni lakapi a Samoa, o Peretania o loo aumai ai isi talosaga faapea ma Ausetalia. “Tatou vaai i le faaulu paepae lea e faiaoga ia Fiti, o le makuā lelei lava o le ‘au a Fiti lea ua iai, lea ga o le soogafai ai o le kakou ‘au”.
Na saunoa le Taitaifono e tāua tele le saili o se faiaoga lelei ina ia manumalo ai pea lava, auā o le faiaina, ma saga faiaina pea o le taunuuga lava o le sui loa o le faiaoga.
O se talanoaga ma le sui Pule sili o le Iuni Lakapi le susuga Faleomavaega Vincent Fepuleai, na ia ta‘ua ai le maualuga tele o le tulaga agavaa o i latou ua talosaga atu ma o le pogai foi lea o le faatuatuai o le filifiliga, ae tofia le susuga Fataalii Milovale Moke e tauaveina le tulaga faiaogaulu mo le aulakapi fitu o loo sauni i taaloga a le Pasefika i Papua Niu Kini i le masina fou, faapea le susuga Junior Leota ae faia ia mae‘ae‘a lelei le faatalanoaina o le to‘a 29 ua talosaga atu.
O le a faia lea filifiliga e se laulau o ni sui o le a tutoatasi le latou faaiuga e aunoa ma le toe aafia ai o le Komiti faafoe o le Iuni lakapi aoao a Samoa. O le tasi itu tāua na faailoa e le sui Pule sili o le Iuni, o loo taumafai e fesootai ia i latou uma ua talosaga ina ia mafai ona maua le avanoa e faatalatalanoa ai.
