E lei faatafatafa loia sa finauina le leai ose faaletonu ile faatinoga o tiute ole Faatonu ma le Sui Faatonu ole Ofisa o moliaga faasolitulafono (National Prosecution Office), ile folasia o mau i luma ole komisi suesue poo le tribunal sa suesueina tuuaiga ole iai ose aafiaga ole Faatonu ma le Sui Faatonu ile faatinoga o o la tiute.
E faasino tuua‘iga ole Faatonu i lona tofia ose loia e tauave ona tiute ina ua faamalolo lē tumau ae faatali le taunuuga o ona moliaga tau taavaleafi, ma le tofia ele faatonu ole sui faatonu e toe iloilo le faila o suesuega faasaga ile Komesina o leoleo ma nisi leoleo na tuua‘ia ise faaseā na suesueina ele Komesina o Sulufaiga.
O tuua‘iga ole sui faatonu ole isi o sona aafiaga vavalalata poo se conflict of interest i lona faia ose suesuega na molia ai le Komesina o Leoleo ma lona lē talia ose fautuaga ale Loia Sili ise isi loia e ave iai le finauina o moliaga tau taavaleafi ole tamaitai Faatonu o Mauga Precious Chang.
Ile molimau ale Loia Sili le afioga Lemalu Herman Retzlaff, na ia tautino ai i luma ole suesuega sa lē tatau ile Faatonu ona tofia e ia lava se loia e finauina ona moliaga, ona e fesiligia ai le faia ole amiotonu.
Ile tele o fesili na tuu atu iai e loia a Mauga ma Miruel Lui e faasino i vaega ole Tulafono ole ofisa o moliaga faasolitulafono, lea oloo matamata tetele mai ai le malosiaga ole Faatonu e filifili ai lava e ia se isi loia i tua atu ole ofisa o moliaga e ave iai ona tiute, ae tasi lava le tali ale Loia Sili, ole faia ole amiotonu e ono mafai ona faaluafesasi ai le maua ole amiotonu pe a toe tofi lava ele Faatonu se isi loia e suesueina ona moliaga.
I fesili agai i tuua‘iga ole Sui Faatonu o Miruel Lui sa faailoa ele Loia Sili, e lei tausisia e lē ua tuua‘ia aiaiga ole tulafono ile faatinoga o ona tiute faasui faatonu ina ua ia fesootai ise isi loia i fafo e ese mai le loia na saili ele Loia Sili e finauina moliaga ole Komesina o Leoleo.
Na faailoa e loia a Miruel o malosiaga foi ia oloo aiaia ile tulafono ole ofisa o moliaga faasolitulafono sa faatino ai tiute ole Sui Faatonu. Ose tasi o vaega na faailoa e loia oloo tutulai mo le Faatonu ma le Sui Faatonu, ole aafiaga ole Loia Sili ma le Komesina o Leoleo ise sāvali na oo ai ile Faamasino Sili mo le fia maua ose tusi saisai poo se warrant of arrest e taofia ai le tamaitai Faatonu.
Na faailoa foi e loia se feiloaiga a Taulapapa Brenda Heather Latu, ole Loia Sili o Lemalu Herman Retzlaff ma le Sui Faatonu o Miruel Lui, na saunoa ai le Loia Sili afai e ave i tua moliaga ole Faatonu e tatau foi ona ave i tua ma moliaga ole Komesina o leoleo.
O lea saunoaga ale Loia Sili i lea feiloaiga oloo faamauina ile faamatalaga tauto poo le affidavit a Taulapapa Hetaher Latu.
Na faaalia ele Loia Sili e leai sana faamatalaga faapea na faia. Sa fesiligia e Aumua Ming Leung Wai le Loia Sili pe iai sona sootaga faaleaiga ile Komesina o Leoleo ae na tali le loia sili e leai.
Ile aotelega o finauga na tuuina atu e loia ma tali iai le Loia Sili sa atagia mai ai ole feteenaiga ole Loia Sili ma le Faatonu ma le Sui Faatonu ile faatinoga o tiute faaletulafono ole mafuaaga tonu o feteenaiga na tulai mai ina ua molia le faatonu i moliaga tau taavale afi ma le suesuega na molia ai le Komesina o Leoleo e mafua ile lipoti o suesuega ale Komesina o Sulufaiga.
E 21 aso ua tuuina atu i sui ole Komisi suesue e faia ai le latou iloiloga ma tuuina atu se latou lipoti ile taunuuga o suesuega ile Minisita ole Ofisa o Moliaga solitulafono le afioga ile Palemia lea oloo iai foi le vaaia ole ofisa ole Loia sili ale Malo.
