Ole Kolisi o Avele ose tasi foi lea o kolisi oloo toatele ana tamafanau oloo iu lelei aoga ma manuia galuega; ole fesili, aisea? Auā ose aoga e faafailele lelei ana tamafanau aemaise ai ole sipili ale Kolisi e lē mafai ona aveesea pe galo i tamaiti aoga, ole galulue faatasi o tamaiti nofo tumau ma tamaiti tausāvali.
E lē gata i lea ole tasi lea aoga sa lē mafai ona talia ai ni tamaitai, ona o amioga a tama ole Kolisi sa iai i lea vaitaimi. Aepeitai, ole fuata ma lona lou, ole taimi foi ma lona suiga. E leai foi se tasi e tu faamauga ise taimi, ile saili malo ai ma le finafinau o lea Kolisi i nisi suiga e tatau ona agai iai Avele ma o lea sa talia ai loa tamaitai i totonu ole Laumalili poo le Puataunofo ile tausaga e 1996, ile taimi lea a‘o avea le tamaitai ia Aiga Esera ma pule o lenei Kolisi, ma ole tamaitai muamua foi lea ua muamua ona ia sosofaina le Kolisi lenei e ala ise pule tamaitai.
Ole toatele o tama ma teine sa faafailele mai o latou olaga ile Kolisi o Avele o lea ua malaga mai fafo ma nonofo ai, ae lē mafai ona tuua pe galo le tupuaga ma le nofoaga na faavae mai ai le ola aoaoina ile poto salalau aemaise ai ole laumua sa tapue ai luitau ma le sipili faaleaoga.
O nei uso ma tuafāfine ile Kolisi ua latou faavaeina se mafutaga a tama ma teine tuai o Avele i Aukilani ua faaigoina ole ACOPA, e pei ona iai le mafutaga i Aukilani oloo peresetene ai le susuga ia Vaniah Toloa ae lagolagosua ai nisi o tamā matutua ma faifeau sa a‘otauina ai foi i lea Kolisi ile tele o tausaga ua tuanai, ua iai foi le mafutaga i Ueligitone, o Ausetalia ma Samoa.
Ole sini ma le faamoemoe maualuga o lenei Sosaiete a tama ma teine tuai, ole taumafai lea e tuufaatasi augātupulaga i vasega mai tausaga taitasi sa iai, aemaise ai ole toe taumafai lea e fausia se fale Samoa i totonu ole laumua i Avele, e iai le talitonuga ole asosi ua tatau ona toe fausia se isi fale Samoa fou e toe aoaoina ai tu ma le aganuu a Samoa e pei ona amata mai ai le kolisi.
Ole afiafi la ole Aso Faraile, 18 o Novema na faia ai loa le uluai dinner a lea asosi ile hall ale Ekalesia Katoliko i Onehuga, e faamanatuina ai le atoaga ole 20 tausaga talu ona talia tamaitai ile Kolisi, faatasi ai ma le faamoemoe lea mo se fale Samoa ile Kolisi.
Ole itu lelei ua galulue faatasi aoga eseese ile lagolagoina ole faamoemoe o Avele e pei ona iai le po ole Aso Faraile, sa auai Malisi, sui ole kolisi o Magele sui ole Kolisi o Samoa faapea le toatele ole mamalu ole atunuu ma aiga sa mafai ona molimauina lea faamoemoe.
Ole susuga ile faafeagaiga ia Rev Fatuatia Tufuga ose tasi o faafeagaiga na aoaoina foi i lea Kolisi na saunia le tatalo e tatala ai le polokalame ona saunoa lea ole Fofoga ole po, le tofa ia Tui Eti Taualapini faapea le faletua ia Verona Parker ose uluai tamaitai na aotauina ile laumua i Avele a‘o lei taliaina teine ile Kolisi, e faafeiloai le mamalu ole atunuu ma le auvalaaulia.
Ole saunoaga autu na saunoa iai le tamaitai pule ia Lafaitele Aiga Poasa Esera, lea sa ia toe fofola uma mai ai le faigata ma le tele o luitau sa iai le Kolisi ao avea ai ma pule aoga, ae lē gata i lea o lona taumafai lea e finauina le Palemene o Samoa e ala ile talia o tamaitai i totonu ole aoga, aluai aluai lea finauga, ma sa iu ai lava ina tatala mai le faitotoa ile malo ma talia ai loa teine i Avele seia oo mai lava ile taimi nei.
Na saunoa foi le peresetene ole Asosi i Aukilani le susuga ia Vaniah Toloa e faafetaia le alofa ma le agalelei ole Atua ona ua mafai ona faataunuuina le faamoemoe ole Asosi ole ACOPA e pei ona fuafuaina aemaise ai o lana faafetai faapitoa i ona uso mai aoga eseese faapea kamupani ma aiga ile tuu mai ole tauau e lagolago ai le latou faamoemoe.
Sa faapea foi ona tipiina ai le keke e faamanatuina ai le 20 tausaga o tamaitai ile Kolisi ma sosoo ai loa ma le taumafataga a‘o faafiafia teine ole Puataunofo, faapea le siufofoga mālie o Eti Taualapini ma le tamaitai o Melenau Lino ile pese ia Eletino na faanofo mālie ai le po.
Saunoa le susuga ile Peresetene ia Vaniah Toloa, o lea ua mafai ona fesootai mai le asosi i Ueligitone faapea ma Samoa ole a galulue faatasi ile taumafaiga ole faamoemoe e ala lea ile toe fausiaina ose fale Samoa i totonu ole Laumua.
