O se faatupu manatu i se isi auala e faaitiitia ai taifau taaloa
O le tulafono ua pasia e le Palemene i se tulaga faanatinati, o le a faamalosia ai le atunuu e iai a latou taifau ina ia laisene ma vaai lelei, mai le taaloa solo aemaise o le osofai ai o tagata ma afaina ai lo latou soifua saogalemu.
O se tasi lea o faafitauli ua leva tausaga o taumafai pea le Pulega o Tagata o Tafafao i lana komiti o le faamamāina o le taulaga ma nuu i tua e faia i ai se togafiti i se galuega fai faatasi ma le Matagaluega o Leoleo ma Falepuipui faapea ma le sosaiete e puipuia le saogalemu o meaola, le Animal Protection Society poo le APS.
Ua tele faaletonu e aliai mai pea i le aafia o tagata pe a osofaia e taifau a aiga, aemaise o taifau taaloa. E oo lava i tagata tafafao poo tulisi ua afāina ai lo latou saogalemu, ma o se tala lē lelei lea mo le atinae o tagata tafafao mai fafo.
O le faafetai foi lea a le toatele o loo atinaeina tulisi ina ua liliu le Malo ma lagolago malosi taumafaiga mo le foia o le faafitauli e pei ona fausia ai se tulafono ua faapitoa lava i le laiseneina o taifau, ma faasalaga ua aiaia ai pe a lē usitaia e tagata e ana taifau le tulafono.
O taimi o pulega a Niu Sila i Samoa sa faamalosia ai le tulafono sa faasino i le vaaiga lelei o taifau, peitai o se tulafono e lei iloga ona faamalosia.
O lea la ua toe faamalosia ina ua iai se tulafono fou ua aiaia ai le totogi o tupe e laisene ai taifau. Peitai o finagalo faaalia o faipule o le Palemene a o talanoaina le tulafono taufaaofi i se tulaga faanatinati, sa faaalia ai le tele o finagalo eseese e aofia ai ma ni finagalo tetee i nisi o aiaiga o le tulafono.
Faaalia e le taitai o le Itu agai ua taugata tele le tupe e laisene ai taifau pe afai e 500 tala. O le mafuaaga ona o le a toe faaopoopo le isi avega ma le faafafa i le atunuu.
O le faipule le afioga Tuilo‘a Anetelea na ia lagolago le tulafono ae tetee i le faia o ni komiti e faamalosia le tulafono i nuu ma itumalo. O lana mau o le a tofia i ai i komiti nisi sa avea ma faipule ona pei lea o le a ulagia ai ia tagata ae e lē fetaui.
Peitai o le finagalo o se tasi o faipule o Aana Alofi le afioga Toleafoa Apulu Faafisi na ia faatepa ai le Palemene i se faatupu manatu o loo aumai i le tulafono.
O lona finagalo e foliga e faaataata a lafoga i nisi o manatu le tulafono, ae o lana silasila e tāua tele le tulafono e silasila ai le Malo i atunuu Asia o le latou matai‘ai o le aano o le taifau, pe atonu e tuuapa ma faatau i ai. O le isi itu na ia faaalia o le silasila o i latou e nafa ma le tulafono pe lē o iai se aogā i le aano o le taifau e vili ae gaosi ai ni meaai mo lafu manu e pei o meaituaolo ma moa.
O le Matagaluega o Leoleo ma Falepuipui o le a nafa ma le tulafono lea o le a latou faatino ai le galuega o le laisene o taifau ma molia tagata ma aiga e lē usiataia aiaiga.
