A‘o tulai mai fevesiaiga ile suafa Malietoa i lenei vaitau ua na‘o le faasiusiumata lava aiga ole Tapaau Faasisina poo fea ae o afea a maua ai se tasi e maua ai le nofo. O suli o ituaiga e tolu ole ituaiga o Malietoa Natuitasina, suli o Malietoa Talavou ma suli o Malietoa Moli, ae ua mapuna a‘e se feteenaiga ile va o suli o Malietoa Tanumafili II ole usuga lona lua lea oloo iai le nofo taufaatu ole susuga lea ia Faamausili Moli.

Ole a taoto le suafa Malietoa i suli ole Malietoa e faaauau a latou finauga ma se nofo e ono tofia pe filifilia ile autasi poo le pule ale faamasinoga. Ae se‘i o tatou tulimataia le fono ale Palemene oloo faagasolo nei, ile tala autu ole tupe 2017 ile 2018 atoa ai ma lipoti o faalapotopotoga ale malo lea ua tuuina atu ile Palemene mo le auiliiliina.

Ua maua mai molimau e faapea ole fonotaga foi lenei ale Palemene ole a faasilasila ai ele taitai ole atunuu le susuga ia Fatialofa Auelua Tuilaepa Lupesoliai Sailele Malielegaoi se tasi ua ave iai le lagolago ale Palemene mo le tofiga ole Ao ole Malo.

Oloo nofo tapuai le atunuu aemaise foi le fono a Ekalesia a‘o filitagaga ai le tofa ma le faautaga i sui mamalu ole Palemene mo se tasi e tulai mai e tauaveina le tofiga ole Ao ole Malo.

Oloo mapuea aiga ale Malietoa faapea foi le aiga Sa Tupuā, o aiga o pāpā, aiga o nofo ise tasi ole a pale mai. E faapea foi ona talosia ele aiga Tauaana, aiga ole Tuiaana, le aiga Satunumafono le taulagi ma le tauaana lea lava faamoemoe e tasi.

Ole matafaioi patino ile filifiliga ole Ao ole Malo oloo faasino ala iai le faavae o Samoa e tofia ma filifilia ele Palemene ole atunuu.

O lea ua lata le taulaumea ua sina foi le galu ma ua itea fanua a lalo, ina ua tau mai lelei le igoa ipu ole tamaloa ole itulagi lea.

Ina ua tuta i Fagamalama le sa o lana afioga ile Tupua Tamasese Efi ma lana masiofo ia Filifilia Tamasese. Ua atoa le 10 tausaga poo le paeaiga sosoo e lua o ia tu ile foe ma uli le sa ole atunuu ile tofiga ole Ao ole malo.

E manatua lana malelega ile faailogaina ole tutoatasi ole atunuu talu ona avea ma faigamalo Saoloto 2017. Na malele ai e faapea ole malo e lelei ole malo filemu ole moe ma le faautaga e mafua ai ona lima taitaiina le tofa ma le faautaga e saili ai mo le lumanai e fuafua ai lelei le tamaoaiga i tulaga gafatia ma manuia ai o tatou tagata Afai o lea ua tuta i taga le sa ole Alataua e pei o lea upu, o ai e ono tofia? E le o fesiligia le malosi atoatoa o lana afioga ile tino ma le mafaufau o meaalofa ia ale Atua i tulaga ese ai lona tamaliiaga mai le taitai ole atunuu. Ua ia te ia le meaalofa nate faasoa ai ile taitaiga o Samoa.

Afua ile talafaasolopito o lona aiga ma ē na latou sailia le mau ina ia saoloto le atunuu e maoae lo latou sao i sailiga malo a Samoa. Oloo tagi mai le eleele le toto o lea suega malo ina ua tagatavaleina Tupua Tamasese ile 1926, e faapea foi ona tele se talitonuga i agavaa ma tomai o lana afioga ia Tuimalealiifano Vaaletoa Sualauvi le lua i ona foi agavaa ma tomai o ia ose loia resitalaina, sa avea ma se malu ole malo i tofiga sinia.

Sa faauluulu iai isi matagaluega ale malo i taimi ua tuanai. Ose sui aloaia o komiti o feau eseese ale EFKS, ose tamalii e lē gaoia. Ose tama aiga e iloga, lona tulaga iloa ma ona uiga tauagafau, lē gaoia ma le filemu.

I totonu ole faavae pei ona silafia i lipoti na uluai auina atu i taimi ua mavae, e le faapea ua noatia ai le Palemene e filifili se tasi o Tamalii ua iai le agavaa, tauleleia ose matai taualoa e le iai ni ona aafiaga faasolitulafono ma e mafai foi ona avea ose sui ole Palemene. Oloo iai foi agavaa pei ona ta‘ua e mafai ai ona filifilia e avea ose Ao ole malo.

Ole mau faalele ale atunuu, o Samoa ole atunuu tofi, e iai ona faalupega taoto ma ona faalupega faavae aua le afifio o aiga ma a latou tama o tama foi ma a latou aiga. O lona uiga o tama e iai a latou aiga, o aiga ia e tua iai tama ua le gata i lea ae ua soo le tai ao, i Samoa i aiga Sa Mālietoa ma aiga Sa Tupuā. Afai e aami le Tupuā le gase, e tatau ona fesiligia le lau mālie ole Faatofalaiga ale taitai ole atunuu faapea sui mamalu ole Palemene.

O ai ole a sosoo? Ole tali ale tusitala, ole a toe filifilia lava le afioga ile Tui Atua Tupua Tamasese, ona sese ai lea i Sasa‘e i totonu o saunoaga faalele ase tasi o toa manumanu o faigamalo, ua taofia lona suafa fai mai, e le toe tofia Tui Atua Tupua Tamasese ile tofiga ole Ao ole malo. Saunoa le alii Palemia ole mataupu lena e fitoitonu ia te au nei ma le Palemene.

Ua mae‘a le palota a uluai faipule ole HRPP e tusa ma molimau na tuuina mai e nisi o faipule e le o fia ta‘ua o latou suafa, i lenei feumiaiga faalotoifale ale pati e puipuia aiātatau a tagata, ole Palemene lava lea.

Comments

comments