O le alii pulenuu o le aai tele o Aukilani poo le Super City, le susuga ia Len Brown, o ia lava sa fofogaina le komiti faafoe, poo le laulau a fono, mo le tauaveina o mataupu, atoa ai ma le faafoeina o fonotaga mo le agai i luma o lea foi tino e pei ona faavaeina.
O le tino lea e pei ona faatuina, o se tasi o vaega ua mae‘a lava ona faatulagaina ma sa iai i totonu o fuafuaga a le Pulenuu ma lana fono faatonu e pei ona sa faataoto a o afuafua mai suiga e pei ona iai nei.
O le manaoga ina ia maua pea fesootaiga lelei, ma faaauau pea faigauo a le pulega faaitumalo tele a Aukilani ma tagata Pasefika.
Ua faaigoaina lenei tino o le Pacific Peoples Advisory Panel, Auckland Council. E toaiva sui sa filifilia mai i le mamalu o atunuu eseese o le Pasefika. O totonu o lea toaiva, e toaono nofoa sa mauaina e tagata Samoa, ae na o le tolu sa faasoasoa mo isi atunuu o le Pasefika lava.O le aso 28 o Fepuari o le tausaga nei lava na uluai fofogaina ai e Len Brown suafa o le toaiva sa manumalo mai, ma sa filifilia mo nofoa e iva e pei ona sa faatulagaina ma manaomia.
O le vaiaso na tea nei aso 5 o Aperila, sa usuia ai le fonotaga muamua a le komiti lea, ma o le latou uluai feiloaiga foi lea, talu ona mae‘a le filifiliga sa faia i le masina o Fepuari.
O le fonotaga sa usuia ma sa talanoaina ma faatulaga ai loa le laulau ma ona tulaga tofi. O le susuga i le faifeau, Rev Uesifili Sofe Tuala Unasa, ua seei i le tulaga Taitaifono (Chairperson). O Orchid Atimalala ua filifilia i le Sui Taitaifono (Deputy Chairperson).
O le afioga i le alii Pulenuu o le faigamalo faalotoifale a Aukilani, Len Brown sa ia taitaia le uluai fonotaga e pei ona tofia ai ma tofiga o loo ta‘ua. Ae sa faapea foi ona auai susuga i alii Faufautua Pasefika, le afioga ia Anae Arthur Anae, ma le susuga ia Alf Filipaina.
O nisi o malo faaaloalogia sa auai, o le Fono Faatonu ma Fono Faufautua mai i itumalo o Waitakere, North Shore ma Manukau.
O isi sui e toaono o Samoa i le fono faufautua lea, e aofia ai le susuga ia Tauleoo Stephen Stehlin, Dr Monique Faleafa, Filemoni Timoteo, ma Toleafoa Sina Aiolupotea-Aiono.
O ase tasi foi lenei o mataupu sa faaseā ai nisi o sui, ina ua mae‘a le faiga filifiliga sa faia ma faalauiloa ai suafa e pei ona ta‘ua i luga. O se feiloaiga ma le susuga ia Rev Uesifili Unasa, o ia ua filifilia ma taitaifono, sa ia ta‘ua ai le auala sa faaaogāina mo le filifiliga o i latou.
E lē faigofie foi le sailia o nisi e tauavea ia tulaga ona e tatau ona malosi le unai ma le fautuaina o le alii Pulenuu, i mataupu ma manaoga i le va o tagata Pasefika, ma le faigamalo faalotoifale.
O le tofia o i latou e pei ona saunoa i ai Rev Unasa, sa faavae lava i agavaa ma tomai i mataupu faaletulafono, aemaise o gaioiga i Matagaluega a le malo.
E lē gata i lea, ae sa manaomia foi nisi e silafia lelei le soifua lautele o aiga ma faalapotopotoga a tagata Pasefika. E silia i le selau tagata sa faia i ai le filifiliga a i latou sa faia faatalatalanoaga e agavaa ai sui ua tofia.
O nisi o tiute ua faataoto nei e le fono faufautua lea mo le Pulenuu, e aofia ai le taumafai e faatalanoa tagata Pasefika mo fuafuaga alualu mamao mo le isi tolusefulu tausaga o lumanai a le Pulenuu ma le aai o Aukilani.
Saunoa Rev Unasa, e lē toe mamao ona valaauina loa lea o ni fonotaga ma tagata lautele o le Pasefika i Aukilani atoa, mo le folasia o mataupu ma fuafuaga e pei ona faataatitia nei.
O le talitonuga o le pulenuu ma lana fono faufautua, o Aukilani o le a tulai mai o se tasi o aai tele ma le tāua ia Niu Sila atoa ma le vaai mai fafo atu o le lalolagi.
Saunoa Unasa, o le tāua o le iai o i latou i lea foi fono faufautua, ina ia mafai ona fai ma alavaa, ma auala e momoli ai manaoga ma fetufaai foi ma tagata Pasefika mo le manuia e toe foi i tagata lautele, aemaise ai o se vaega tāua mo le Pulega faaitumalo.
