Ua iai nei i Siamani le pulega ma i latou uma oloo faatinoina le ata tifaga fou ua faaigoaina, “One Thousand Ropes” mo lana uluai faaaliga ise tasi o aai ta‘uta‘ua ile lalolagi i Perelini i Siamani, ile faaaliga tele o mea nei o ata tifaga, le Berlin Film Festival, e amata nei ile aso 9 o Fepuari.
Ole One Thousand Ropes, ose ata tifaga na tusia ma faatonutonuina ele alo o Samoa, le susuga Tusi Tamasese, ose suafa foi ua lē o toe fou i lenei tomai ole fai ata tifaga. O ia foi e na tusia ma faatonutonuina le ata tifaga na maimoaina ma fiafia iai le toatele, The Orator (Tulafale), lea sa faaali ai foi i lea festival i 2013.
Peitai na ta‘ua e Tamasese i sana saunoaga, ‘Ose faaeaea sili lea mo ia le mafai ona filifilia lana ata tifaga i lenei faaaliga iloga i lea foi vaega ole lalolagi o faafiafiaga, aemaise lava ona o lea ole a faaali ile vaega faapitoa ole faaaliga poo le festival e ta‘ua ole Panorama e avea ose Panorama Special..’
Ole One Thousand Ropes, ose uluai ata tifaga lenei a Niu Sila ua filifilia mo le Panorama talu mai le ata o le No. 2 ile 2006, ae ole lona tolu ai lea ose ata ua faamatilatila ai foliga o mea i Niu Sila ua faaalia i lea vaega.
Ole Panorama ole vaega lea e iai screen matuā tetelē e faaali faalauiloa ai ata tifaga fou mai ni faatonu iloga (renowned directors) i lenei taleni, o ni ata faatoa faaali mo le uluai taimi (debut films) ma ni mea fou faatoa maua ma faalauiloa i ata tifaga (new discoveries).
E tāua tele ile au faiata tifaga i Niu Sila lenei avanoa ole a faaali ai le One Thousand Ropes ile faaaliga i Siamani, auā ose avanoa sili ole a faafofoga ai tagata mai soo se itu o Europa e lē gata i siufofoga ae o tala faamatala foi mai lenei itu ole kelope.
Ose avanoa sili foi ona tāua mo i latou oloo galulue i lenei matata ole fai ata tifaga, e tofo ai ile faamalieina ole vaai atu ua faaali mai a latou ata tifaga i luga o screen tetele ma maimoaina ele faitau fia afe o tagata mai atunuu eseese.
Ole tele o vaega o lenei ata oloo autu atu ile tamaitai talavou o Frankie Adams ma le susuga Uelese Petaia, oloo la faaata maia vaega ase tamā ma lona afafine, faapea foi Beulah Koale ma Sima Urale. O lenei ata e faaaogā ai gagana uma e lua, le faaperetania ma le faasamoa.
Ole One Thousand Ropes ua faatupeina ele NZFC ma le Fulcrum Media Finance. Ae ole faatauina atu o lenei ata ile lalolagi atoa ua faafoeina ele Mongrel Media.
E amata le Berlin Film Festival ile aso 9 o Fepuari i Perelini i Siamani lea ole a faaali ai le One Thousand Ropes, ae ole aso 23 ole masina fou ia Mati ole a faaali ai loa i faletifaga i Niu Sila ma Samoa, ma maimoa ai le atunuu ile atoaga o lenei ata tifaga.
