O se taimi muamua lenei ua tofia ai se sui o tamaita’i e avea ai ma faatonusili mo le galuega a le autalavou mo Keriso poo le Y.F.C i Samoa talu mai ona faavae mai ai ile tausaga e 1973.
O le tamaita’i ia Sili’a Kilepoa Ualesi ua tusilima iai le komiti faafoe o le Y.F.C ina ia avea ai ma faatonusili e suitulaga ile faatonusili talu ai lea ua faamavae mai i lea tofiga le susuga ia Manasa Aloali’i ile amataga o le tausaga nei ona o nisi o galuega ua valaauina ai lona soifua.
O le susuga ia Ualesi ua tele tausaga o galue mai i totonu o le galuega a le autalavou mo Keriso, sa avea foi ma failautusi mai le tausaga e 2007 seia oo mai ile tausaga e 2015 ao lei malaga atu ma galue ai i totonu o le Malo o Fiti ile vaega o le I.R.E.N.A. (International Renewable Energy Agency).
O le tausaga na tea nei 2017 na toe taliu mai ai i Samoa le susuga ia Ualesi ma faaauau ai pea ona ave lana lagolago i galuega a le Y.F.C e pei ona tofia ai ma faatonu le tumau ao tau sailia ai se faatonusili.
Taua e Ualesi o lona valaauina e tauaveina le tofiga faatonusili mo le galeuaga a le autalavou mo Keriso o se valaauina mai le Atua ona o se musumusuga mai le Alii ua oo ile taimi e faaogaina ai lona ola mo le galuega a le Alii e ala ile taumafai lea e molimoli atu le talalelei a Iesu i ola o tupulaga talavou o Samoa aemaise i latou ua aafia ile tele o faafitauli o le olaga e pei o fualaau faasaina ma nisi ua aafia foi soifua ia latou faaiuga fai. Na faamaonia e le tamaita’i ia Ualesi lona valaauina ina ua ave iai se upu faaperofetaga e se tasi o Perofeta mai Amerika lea na avea ma lauga aami o se Sauniga Faaevagalia na faia ai ile faaiuga o le masina na tea nei i totonu o le atunuu.
O le soifua galue o Ualesi na galue ai foi ma se tasi na pulea le vaega o Poloketi ile vaega o le S.P.R.EP faatasi ai ma le tele o isi galuega maualuluga na mafai ona ia galue ai peitai e lei mafai ai lava ona aveesea lona naunautaiga e fia tautua ai pea ile galuega a le Atua e ala ile Y.F.C.
O le galuega lenei a le Autalavou mo Keriso o se faalapotopotoga e aga’i le latou galuega mo olaga o tupulaga talavou o Samoa, ma e toatele nisi o avea nei ma
faafeagaiga i nisi o Ekalesia Kerisiano ile atunuu na amata fofoa mai ai o latou soifua kerisiano ile autalavou mo Keriso e pei o le susuga ile Aposetolo ia Viliamu Mafo’e lea o avea nei ma taitai o se tasi o Ekalesia tele ile atunuu le Worship Centre, sa avea ai foi Mafo’e ma faatonusili o le Y.F.C ile tele o tausaga ua alu, faapea foi le susuga ile faafeagaiga o le Ekalesia Peace Chapel i Samoa le susuga ia Pastor Samoa Unoi na avea foi ma se tasi o sui faavae o le autalavou mo Keriso.
O le galuega a le autalavou mo Keriso e faalagolago lona faatupeina i foa’i mai ile loto faitalia o tagata, ma o se tasi lea o vaega na saunoa iai le faatonusili fou, e le’o le tupe ae o le fia faaogaina o lona ola mo le galuega a le Alii.
O nisi o galuega a le autalavou mo Keriso o lo o iai ile taimi lenei e aofia ai le toe faaola o le leitio kerisiano o le Laufou o le Talalelei e pei ona iai i Mulinuu lea e tele ina faaogaina mo le faasalalauina o le upu folafola a le Atua aemaise foi o galuega tala’i a le Y.F.C.
Ua tautino Sili’a Kilepoa Ualesi, ua ia sauni e tauaveina lea tofiga ma galulue faatasi ai ma le komiti faafoe ina ia faataunuuina le miti ma le faamoemoe na alai ona faatu lenei galuega i Samoa, o le manumaloina lea oni agaga mo le galuega a le Alii aemaise lava o tupulaga talavou o Samoa.
