Filifilia le faauluuluga o le Matagaluega o Pisinisi, Alamanuia & Leipa

Ua faamaonia e le Kapeneta le tofia o le Afioga Auelua Taito Samuelu Enari, e avea ma faauluuluga fou o le Matagaluega o Pisinisi, Alamanuia ma Leipa, ma ua sui tulaga o ia i le afioga Lemalu Tate Simi, lea ua filifilia e le Malo e avea ma Haikomesina o Samoa i Ausetalia. O lea avanoa faigaluega sa faasalalauina mo le masina atoa, na amata mai i le aso 20 Fepuari 2009 – 20 Mati 2009 ma e toafitu (7) i latou na tuuina atu tusi talosaga, ma na agavaa uma foi i latou na mo le faatalatalanoaga poo le interview.
O nisi o vaega sa silasila i ai le Komiti o le Faatalatalanoaga, o itu e faatatau i: talosaga tusitusia na tuuina atu, tomai faapitoa & agavaa moomia, curriculum vitae, tusi faamaonia, poto faapitoa & poto masani, taitaiga ma le pulega o tupe, tagata faigaluega ma aseta.
O le maea o le iloiloga a le Komiti o le faatalatalanoaga, na tuuina atu ai le fautuaga i le Kapeneta mo le tofia o le susuga ia Auelua Enari i lea tofiga. O le susuga Auelua Taito Samuelu Enari e mai i afioaga o Lepā ma Vaiala, ma e tofia nei o loo avea ma Pule Sili Lagolago i le Vaega o Fefaatauaiga i le Matagaluega o le Vaifafo ma Fefaatauaiga. O loo ia umia se faailoga Tikeri i mataupu tau tamaoaiga poo Economics mai i le Univesite o le Pasefika i Saute.