Ua ausia e Samoa se isi sitepu maualuga i le atiina a‘e o le lakapi ina ua lautogia se tasi o alii laufali le susuga Tui Komiti e auai i le faafoega o le taamilosaga lakapi i le Ipu a le Lalolagi mo alii talavou e i lalo o le 20 tausaga le matutua lea o loo faagasolo i Georgia i Rusia.
Ua faailoa mai e le Iuni Lakapi a Samoa le maualuga o lea foi matatia ma o se luitau tele lea sa feagai ma le vasega o alii laufali o le lakapi i Samoa, ia iai nisi e saofaga i le faatinoga o taaloga faavaomalo.
Saunoa le alii ofisa o le vaega o loo nafa ma le atinaeina o lenei foi tomai o le laufali, susuga Papalii Tulouna Avia, o lo tatou avanoa lenei ua maua, ma ua tuu uma atu faatuatuaga o le atunuu aemaise foi le sosaiete a laufali i le susuga a Komiti ma lona faatinoga o le taleni.
O le amataga o le tausaga nei na ofi atu ai le alii laufali o Tui Komiti i se a‘oa‘oga i lea tomai a atunuu o le Oceania ma faapea ona filifilia ai auā o le laasaga maualuga lea e mafai ona matala ai le faitotoa mo se avanoa o se laufali mai Samoa i taaloga tetele faavaomalo.
O se faatasiga a le iuni lakapi i le tausaga ua mavae sa ave ai le lu‘i a le taitaifono o le iuni le afioga i le Palemia i le vasega o laufali, ina ia taumafai e oo i lea tulaga maualuga ua ausia nei.
O se tasi lenei o tomai e lē o toatele lava nisi mai Samoa o mafai ona ofi atu i ai, ina ia avea ma laufali mo taaloga faavaomalo.
Peitai na ta‘ua e Papalii Tulouna, sa iai nisi na amata ona toleni ma sauniunia mo lea laasaga ma sa iai lava le talitonuga e ono oo i ai, peitai e uma ane ua toe suia foi a latou fuafuaga; o nisi ua tuua Samoa ae malaga atu i isi atunuu e pei o Niu Sila.
Ta‘ua e lea sui o le asosi, e lē o se mea faigofie foi le avea ma laufali.
E pei lava o la e te toleni ina ia avea oe ma tama taalo lakapi lelei, e tatau foi ona e matuā malosi ma lava lelei lau mānava, auā o le mea lava e taavale pe pasi i ai le polo, e tamomoe uma i ai tama taaalo, e tamoe atu foi i ai ma le laufali. Ma e iai foi suega tusitusia e tatau ona pasia e se tasi.
O mea uma la na ua iloga ona agavaa mai ai le susuga Tui Komiti, ma ua tele vaega o le taaloga ua ia pasia aemaise lava i totonu o taaloga a le atunuu, ae o lea la ua amata nei ona laalaa atu i taaloga faavaomalo.
O se luitau foi lea mo isi alo o le atunuu o loo taulai atu i lea lava taleni e tasi, auā o lea ua malaga Komiti i fafo, ae o loo faaauau pea a‘oa‘oga mo tomai tau laufali i totonu lava o le atunuu.
