Ua faasilasila mai e le Pacific Events & Entertainment Trust Board & komiti o le Miss Samoa New Zealand, le filifilia ai o le tamaitai talavou o Latafale Auva‘a e avea ma Miss Samoa NZ 2014-2015.
E toaono (6) tamaitai na faaulu o latou suafa e tauva ai mo le sailia o se Tausala poo se Lalelei o Samoa Niu Sila, le Miss Samoa New Zealand i lenei tausaga 2014-2015.
O le 23 ai lenei o tausaga talu mai ona amata le tauvaga o le sailia o se Miss Samoa NZ. Ae pei ona avatu i nisi o tala i se taimi ua fano, o le tausaga lenei ua suia ai le faatinoga o lea tauvaga.
Nai lo le toe faia o se faatasiga atoa e pei ona sa masani mai ai, ae o le tausaga muamua lenei ua faatino uma i luga o fesootaiga tau initaneti le auala na tali mai ai tamaitai i fesili ma vaega eseese sa fua i ai o latou tomai e ausia ai le avea ma tamaitai e tauaveina le pale o le Miss Samoa Niu Sila.
E fou i le faafofoga a nisi lenei faiga, ae ua faamaonia le tāua foi ma le aogā o lenei auala, auā ua leai ni tupe e faaaluina ai e tamaitai tauva ma o latou aiga mo le tau tapenaina o mea uma mo tauvaga faapenei.
O le itu tāua o loo maua tonu le auga o le faamoemoe, ia maua se tamaitai Samoa e talafeagai e avea ma sui o tagata Samoa uma i Niu Sila, e tauva ai i le tauvaga i Apia i le masina fou o Setema e taualuga ai faafiafiaga o le Teuila, pe a sailia se tamaitai e toatasi e fai ma Tausala o Samoa atoa, mo le sailia o se Tausala o le Pasefika i se taimi mulimuli ane.
O Latafale ua 20 tausaga o lona soifua, ma e faamautu ma lona aiga i Papakura i Aukilani, a o ona afioaga i Samoa o Tiavea, Saleaumua, Vailoa i Faleata, Satupaitea, ma Siufaga.
O loo aoga lenei tamaitai i lona avanoa faasikolasipi i le Iunivesite a Otago i Dunedin, ma o lona tausaga lona tolu lenei o loo aoga ai mo lona faailoga double degree in Law and Music, Majoring in Performing Arts.
O loo iai le faamoemoe o le aso 13 o le masina nei o Aukuso, e faia ai se sauniga faapitoa o le a faapaleina ai e le Miss Samoa NZ o loo iai i le taimi nei, Margaret Sarona Scott, le tamaitai ua filifilia nei e faaauauina le pale o le Miss Samoa NZ mo le 2014-2015, Latafale Auva‘a.
