Ua taunuu se tasi o moemitiga a le alii aoga o Dallas Junior Tagaloasa i lona olaga taalo, o lona fia auai i ni aufili i totonu o Niu Sila, e pei ona filifili ai o ia i le auvoli polo a alii i lalo o le 19 tausaga (New Zealand Junior Men’s Volleyball Team – Under 19).
O se manaoga na finau tele i ai lenei alii, ae sa o faatasi ai ma le tapuaiga ma le tatalo a nai ona mātua ma lona aiga, ua mafua ai ona tau lau o lona faamoemoe. Ua taunuu ai upu a le Tusi, afai e lē atinae e Ieova le fale e galulue fua i latou o ē atinae.
O se matatia ua faafiaiaina ai lona aiga atoa aemaise o lana aoga o loo aoga ai nei i One Tree Hill College.
O Dallas Junior faatoa 17 tausaga lona matua ae o se alii e poto toe atamai i tulaga tau le aoaoga i totonu o potuaoga aemaise foi o taaloga. E fai o ia ma faamanuiaga i totonu o lona aiga ma lana aoga i ona uiga tausaafia ma le laumata ataata i soo se tagata.
O lona olaga aoaoina na amata mai i Clendon Park Primary School, sosoo ai lea ma Pomaria School Henderson. Na ave lana Vasega 10 (Yr 10) i Southern Cross ma ia mauaina ai le faailoga o le sili aoao i lea vasega. O loo faaauauina lona olaga aoaoina i le Kolisi o One Tree Hill mai le Vasega 11-13 ma o loo avea ai foi ma Head Boy i totonu o lenei kolisi.
Na amata taalo mai Dallas Junior Tagaloasa i le lakapi a o laitiiti, peitai o le 7 o ona tausaga na sui ai loa i le Volipolo le taaloga ua see i ai lona fiafia. O loo taalo nei i le kalapu voli a Sparta lea ua 3 nei tausaga o taofiofi ai pea e lenei kalapu. O ona tuaa o Setoa Junior Tagaloasa mai le afioaga o Sataoa i Safata ma Letogo i le Vaimauga, ae o lona tina o le ‘afa Tonga ma le ‘afa palagi.
O loo taoto nei le isi o ana moemitiga ma lona faamoemoega, o le fia ulufale atu i le Iunivesite auā aoaoga mo le faafomai auā e fia fesoasoani mo ona tagata Pasifika. E leai se mea e faigata i le Atua.
Na momoli le agaga faafetai o le alii o Dallas i lona aiga, i ona mātua ma mātua o mātua ma lona aiga atoa mo le alofa ma le lagolagosua sa latou faamalosiau ai ia te ia a o faagasolo ana aoaoga ma taaloga. Ae o lana faafetai sili i lona agaga lotomaulalo ma le faatauvaa, e sii a‘e pea i le Tamā i le lagi.
Nisi o ana ausiaga na faamanuiaina ai i aoaoga & taaloga:
(Aoaoga)
2015 – Head Boy o le One Tree Hill College
2014 – Runner Up for Pasifika Awards Year 12
NCEA Level 2 Endorsed with Excellence
Prefect, Pacific PRIDE member,
2013 – NCEA Level 1 Endorsed with Excellence
Pasifka Awards Top Student Year 11 – Science, Biology, Chemistry, English, Maths
2012 – Top Academic Award for Year 10 Student (Southern Cross Campus)
(Taaloga)
2015 – Filifilia i le New Zealand Junior Men’s (U19) Volleyball Team
2013/2014/2015 – Filifilia i le Auckland Secondary School Boys Volleyball Team
2014/2015 – Kapeteni i Senior School Boys’ Volleyball Teams (Premiers)
2014 – Runner Up for Premier Division Secondary Schools Volleyball Nationals (Palmerston North)
2015 – Runner Up for Premier Division Secondary Schools Volleyball Nationals (Palmerston North)
