O le upu a le atunuu, ‘O le ala i le pule o le Tautua’ ma ua faamaonia lenei mau i le filfilia e le Parramatta Eels o le alii o Jonathon Mose mai le kalalapu liki a Cabramatta.
O Jonathon Mose ma le susuga ia Jermaine o nisi nei o sui iloga le alualu i luma o a la taleni taalo ma ua faaopoopo atu nei i le tele o tama Samoa ma le Pasefika i le kalapu a le Parramatta Eels.
O Jonathon o se alii talavou o loo avea ma se sui o le Fono aoao a tagata Samoa i Sini lea e tauave ai e lona tina le tofi Failautusi. E aafia foi ia i polokalame a le tupulaga talavou a le Fono Aoao lea e fesoasoani i taimi o aso faapitoa e pei o taaloga, tutoatasi aemaise faigalotu.
O ia o le alo o le afioga a Aupaau Kirisome Mose ma le faletua ia Feagai Kirisome Mose. E lē gata o le auai o lenei alii talavou faapea ona uso ma tuafāfine i le mafutaga a le Fono Aoao a Samoa i Sini, ae tapuai foi lona aiga i le EFKS a Liverpool.
E lē gata i nei tautua i le mamalu o Samoa i Sini, ekalesia ma le taaloga o le lakapi liki, ae o ia foi o se sui o le faaili a lo latou aiga lea e faaigoaina o le ‘River Jordan’ lea e aofia uma ai ma ona uso faapea o latou tuafāfine e toalua matutua.
Ua faafiafia la latou faaili mālie i le tele o tusigaigoa ma siva Samoa i Sini aemaise le tatalaina o nisi o pisinisi. O le auai ai o Jonathon Mose ma Jermaine i le aufili a Parramatta o le a fai lea ma faamalosiau ma faaolatotoga mo le tele o a la uo ma alo o Samoa o loo fia avea le lakapi liki ma taleni e tuliloaina mo le lumanai.
