O le faaitiitia o le solitulafono mai tupulaga talavou i le pitonuu o Blacktown i Sini Sisifo ua amanaia ai se ulugalii Samoa talavou o loo taulamua i le atinaeina o le tupulaga.
O Joe Tau ma lona faletua ia Jojo Tau ua avea nei ma Samoa muamua ua ofi atu i le Fono Blacktown faafetai i la galuega lelei.
O le susuga Joe o ona tupuaga e mai Tiavea ma Faleasiu, o lona tama o Malaesala Su Tau ma si ona tina o Kalala. O lona toalua ia Jojo e mai Vailima ma Papauta. O lona tina o Joanne mai Niu Sila ma lona tama o Ben Lee ua maliu.
O le sao o Joe ma Jojo i le faatoafilemu o fanau Samoa ma le Pasefika mai le 12 tausaga i le 24 tausaga e auala mai i se ausiva faaneionapo ua alu ai taimi o le fanau ma lē toe tataa ai i po ma faaiuga o vaiaso.
O Fepuari 2011 na amata ai lenei ausiva ma e lua selau limasefulu tupulaga ua sisiva ai.
O po o Aso Faraile mai le 6.30 agai atu i le 8.30 i le po e faia ai faataitaiga ma mafutaga auā e tai ono vaiaso ma faafiafia i latou i le Westpoint Blacktown Shopping Centre.
E le gata o le mataina o a latou faafiafiaga i le maimoa a tagata faatau ua vaaia ai foi le tinou o le ausiva e sisiva ma maua ai nisi avanoa e feiloai atu ai isi ausiva ma aoaoga.
E sefulutasi Faalapotopotoga o loo lagolagoina lenei faamoemoe.
O le susuga a Joe Tau o loo galue i le Aoga maualuga a Doonside i le Tekonolosi ae o Jojo Tau o loo galue i le faletupe a le Commonwealth.
O se fesoasoani taua tele i lenei polokalame a le SWITCH o le alii leoleo ia Mark Wright.
O le uiga na faailoa e Joe ma Jojo Tau na faaigoa ai lenei polokalame o le ‘Switch’ ina ia sisiva le fanau ma silafia e tele avanoa i le soifuaga o loo matala mai pe afai e amata ona galue i se sini autu mai le talavou.
