Filifila Natalie Leitulagi Toevai Miss Samoa NZ 2017 – 2018

Le tamaitai o Natalie Leitulagi Toevai ua avea nei ma Miss Samoa NZ 2017-2018 - Photo: Fata Tuialii (MSNZ)
Le tamaitai o Natalie Leitulagi Toevai ua avea nei ma Miss Samoa NZ 2017-2018 – Photo: Fata Tuialii (MSNZ)

E ui ile toatele o Samoa oloo aumau i Niu Sila, peitai, ae toatasi lava le tamaitai Samoa e filifilia e avea ma Tausala o Samoa NZ poo le Miss Samoa New Zealand, e tausinio ile sailia ose Tausala o Samoa i tausaga taitasi.  E ese mai ai Ausetalia, lea e toatolu tamaitai ole a agai atu e tauva mo le sailia ose Tausala o Samoa, e pei o le Miss Samoa NSW, Miss Samoa Queensland ma le Miss Samoa Victoria.

Ole Aso Toonai na tea nei na fai ai le tauvaga faaiu a Niu Sila e pei ona tausinio ai tamaitai e toafa, na filifilia mai ile 23 o tamaitai na talosaga, e pei ona faapaleina ai le tamaitai lalelei o Natalie Leitulagi Toevai.

Ua faapaleina le tamaitai o Natalie Leitulagi Toevai e fai ma tausala Samoa o Niu Sila, ile sailiga tausala ile po ole Aso Toonai, aso 8 Iulai 2017.

Ole fiafiaga tele lea ile komiti faafoe ole Tausala Samoa i Niu Sila nei, ona ua maua se tausala e fai ma sui o Samoa i Niu Sila nei.

Ole toatele o sui na talosaga pe faaulu mai ile tauvaga mai i luga ole upega tafailagi. Ole 26 nei o tausaga talu ona faatinoina lenei faamoemoe mo se Tausala o Samoa i Niu Sila nei e nate tausinio ile sailiga Tausala a Samoa i tausaga taitasi lea e faatautaia i Apia Samoa.

E to‘a 23 i latou na faaulu mai mo le sailiga tausala, ae to‘a 4 i latou na fai iai le filifiliga mulimuli mo se Tausala Samoa i Aotearoa, lea ua manumalo ai le tamaitai lalelei e 23 tausaga mai Magele, o Natalie Leitulagi Toevai, mai le afioaga o Afega, Vailele, ma Vaisala ile motu tele i Salafai.

Ole manumalo ai ole tamaitai o Natalie ose mitamitaga lea mo ia e nate tauavea ai le tofi o Niu Sila ile tauvaga o Tausala a Samoa o loma nei, aemaise lona fia tautua mo le atunuu.

“O lo‘u tausinio ai ile sailiga tausala o Samoa i Niu Sila nei, o lo‘u naunautaiga ole faasoa lea ma faatāua le aganuu, tu ma agaifanua a Samoa. O lo‘u faanaunautaiga ia unaia tagata Samoa ma le Pasefika e faatāua ana tu ma agaifanua, aemaise le toe tagai ile faavae ma talaaga ole vavau, ma le saili malo o ona tagata.”

“Oute fia faamanatu atu i soo se tamaitai Samoa ona tupuaga mai tala ole vavau ia Nafanua ma Salamasina o nisi o taitai malolosi i Samoa mai ona talaaga.”

“O suiga ua iai nei le lalolagi ma aga tu ma aga, e le ose itu e ono aafia ai le tatou tu ma aga pe afai e ave iai le tatou faamuamua, e ala lea ile tausisi i lo tatou faavae ile faatuatua, loto maualalo, faamaoni, ma le saili malo,” ta‘ua ele tausala.

O tulaga muamua i vaega taitasi. Siva Samoa na manumalo ai Natalie Leitulagi Toevai. Ole tamaitai o Manufaaifomailagi Rowena Fuao na manumalo ile tulaga ole Faafeiloai poo vaega Tomua, toe manumalo ile tauvaga taleni. Ae o fesili ma tali na manumalo ai le tamaitai o Brittany Tasesa Stanley-Wishart.

Ile aotelega ole tauvaga na manumalo ai le tamaitai o Natlie Leitulagi Toevai; tulua Manufaaaifomailagi Rowena Fuao mai le afioaga o Vaimoso, Tanumalala; tutolu Brittany Tasesa Stanley-Wishart mai Savalalo, Vaigaga, Lepea, ma Leififi, ae tufā ai le tausala ia Kahlia Renee Tapsell-Ulae mai Malaemalu, Falealili, ma Faleula.

Ta‘ua e Ulalemamea Te‘eva Matafai le faatonu ole sailiga ole Tausala a Samoa i Niu Siula e faapea, “O sui uma e toafā na fai iai le filifiliga e agavaa uma ile tauaveina ole Tausala Samoa Niu Sila, peitai, ole tamaitai ua faapaleina ia Natalie na manumalo ile tele o togi ile aotelega o vaega na togi iai le tauvaga.”

Ole faaiuga a faamasino sa aumai lea i togi tuufatasi uma mai le amataga a‘o lei faia le tauvaga autu. Ua nofo faasauni atu nei foi le tausala ia Natalie i ana tapenaga mo le tauvaga autu ile Teuila ile tausaga nei, e sailia ai se Tausala mo Samoa e tauaveina le Igoa ole Atunuu ma tofi faatausala e pei ona faia i tausaga taitasi.