Ua iai nei ni nai fesuiaiga ua mae‘a ona faataoto e le Pulega ma le Komiti o loo tapenaina tauvaga i tausaga taitasi, mo le sueina o le Lalelei o Samoa i Niu Sila.
O se tasi o nei fesuiaiga o le a faapea ona faaaogāina ai fesootaiga i luga o le initaneti mo le filifiliina o ni sui tauva mo le ‘Miss Samoa New Zealand – 2014’. O loo ua tatalaina mai le avanoa i le taimi lenei seia aulia le aso 31 Iulai 2014 e tapunia ai.
O le faatinoga o lenei faamoemoe, o loo ua tuu mai ai le avanoa mo sui tauva ina ia pueina faaata tifaga (video) o latou ata – e faailoa atu ai sina faamatalaga e faatatau ia i latou, aemaise ai foi e iai se fesili o le a tuuina mai e le Komiti e tapena i ai sui tauva, ma faailoa atu i le taimi lava lea a latou tali. O lona uiga e lua tapenaga faaata tifaga pupuu, e tatau ona auina atu e se tamaitai o loo fia tauva.
O le auga o lenei faamoemoe, ina ia maua le avanoa lautele e ala i fesootaiga faaonaponei, e fesootai mai ai tamaitai talavou o loo fia auai i le tauvaga o lenei tausaga, ma ia toatele ni tamaitai e fili mai ai ni sui tauva. A mae‘a ona faatinoina laasaga uma mo lenei faamoemoe, ona alo atu loa lea o le tamaitai ia Margaret Sarona Scott, o lē o loo paleina le Miss Samoa New Zealand mai le tausaga ua mavae – mo le faauiina o le pale i lē o le a manumalo i le tauvaga lea e faia e tauala i fesootaiga i le initaneti.
O le faletua ia Ulalemamae Te‘evā Matāfai o loo faauluulu i ai le Komiti o loo nafa ma lenei faatautaiga. Ua faaalia foi e le afioga ia Ulalemamae i se pepa o faamatalaga na tuuina mai, a mae‘a le tauvaga lenei i Niu Sila i le masina fou ia Aukuso, ona malaga atu lea i Samoa lē o le a manumalo, e fai ma sui o Niu Sila, i le tauvaga o le Miss Samoa, o loo fuafuaina i le vaitaimi o le Teuila i le masina o Setema.
Ua savali i le 23 tausaga talu ona faatinoina lenei faamoemoe i Niu Sila. E mafai ona maua le faletua ia Ulalemamae Te‘evā mo nisi faamatalaga atili i le 021 648 637 poo le imeli misssamoanzpageant@gmail.com.
