Ole tala ave, a’o se matatia foi lea ua ausia e se alo tamaitai muamua o Samoa i totonu o Niu Sila nei i lona ausia lea ole 100 ana taaloga i totonu o Aukilani talu ona ia auai i lenei faagatama ole lakapi.
Ole afiafi ole Aso Faraile na atoa iai le selau tausaga talu ona taalo lea alo ole atunuu le tamaitai ia Seiuli Fiaoo Faamausili i lana kalapu a Malisi, lea sa taaalo ai ma le ‘au a North Habour. O lagona ole fiafia ua faailoa e lea tamaitai talavou ona ole tele o taaloga ua mafai ona ia ausia i lona soifuaga taalo pe a faatusatusa i nisi o tama taaalo ole lalolagi aemaise lava i nisi o tama iloga ole Olopeleki.
Ole tausaga e 1997 na amata ai ona taalo Seiuli Fiaoo Faamausili ile taaloga, ile kalapu a Malisi, ma o lena taimi tele ma tausaga e tele na faananau ai le tamaitai e fia maua sona avanoa e ofi atu ai ile ‘au tele a tamaitai ole atunuu o Niu Sila le Black Ferns. Ma na taunuu le moemitiga a lea alo ole atunuu ona ole loto finau ma le ola saili faatasi ai ma le lagolago a lona aiga i lona faamoemoe.
Ole tausaga e 2002 na sao atu ai loa le sa ole tamaitai o Seiuli Fiaoo Faamausili i totonu ole Black Ferns, seia oo mai lava ile taimi nei. Ua 52 le aofaiga o ana taaloga i totonu ole Black Ferns, ae ole tausaga e 2012 na filifilia ai loa ia ele pulega ole ‘au e avea ma kapeteni seia oo mai lava ile taimi nei. Ua le maua ele tamaitai ia Fiaoo Faamausili le aofaiga o taaloga talu ona ia kapeteniina ai le Black Ferns ae faatolu ona malolo lana ‘au i taaloga a’o tulai mai ai ile tofi.
Ole 2014 ole Ipu ole Lalolagi muamua lea na ia kapeteniina ai le Black Ferns talu ona taalo, ae sa le faamanuiaina ai lana ‘au. Ole 2017 ile tausaga nei lea sa toe masii atu ai le Black Ferns ile Ipu ole Lalolagi lea sa faia i Ireland ia Aukuso, ma siamupini mai ai loa le Black Ferns ina ua malolo ai le ‘au malosi a tamaitai mai Egelani ile la sailiga Siamupini ile 41 ‘ai ile 32. Ua faalua ai lea o taamilosaga ale Ipu ole Lalolagi talu ona kapeteni lea alo ole atunuu.
E malosi le faanaunauga ole tamaitai ia Seiuli Fiaoo Faamausili i lea taaloga, talu ai ona ole toatele o alo tamaitai oloo fiafia ile taaloga ole lakapi, aemaise ai ole toatele foi o tamaitai oloo fiafia e uma loa le taaloga ona agai lea e fesoasoani e a’oa’o ma atia’e le taaloga i fanau teine aoga ma tupulaga talavou tamaitai, lea ua naunau ai lava e faia lana taleni lea ua ia iloa ai e aogā i lona aiga aemaise ai o tupulaga talavou mo se manuia o latou olaga aemaise o aiga.
Mafaufau ua tatau ona malolo mai ile taaloga
Oloo iai le lagona ole tamaitai ia Seiuli Fiaoo Faamausili ile tausaga nei, ua tatau ona faamuta ai lona taalo ile taaloga ole lakapi, ae lei oo ile tausaga fou.
Ona o lona manatu, ua umi foi tausaga talu ona ia faia le taaloga, ma ole tele foi o lona taimi oloo alu ai ile taaloga, ae le gata i lea, oloo tele foi ana mea oloo fia fai i totonu o lona aiga aemaise o lana galuega, ua tatau ona iai sona taimi tele mo le galuega.
E lei ma’oti lelei se filifiliga ale tamaitai mo le tausaga fou ae na’o se ata ua faataoto ile taimi nei a’o faauma ai ana taaloga i lenei tausaga.
O Seiuli Fiaoo Faamausili ole alo e faasino ile tamā ia Galumalemana Tavita Faamausili ma le tina ia Nasareta Monanu Faamausili, mai le afioaga o Faleula, Aleisa ma Fogapoa. Na soifua mai o ia ile aso 30 o Setema ile 1980 i Samoa.
Na malaga mai i Niu Sila nei ile 5 o ona tausaga ma aoga ai ile aoga tulagalua i Kingsford i Mangere East ma faaauau atu ai i nisi o aoga ae faaiu ai ile Kolisi o Aorere. Ua 36 le matua o lona soifua ae ole 17 o ona tausaga na amata ai ona taalo ile lakapi, ma e toatolu ona tuagane ae toafā ona uso.
