Fiafia Tuilaepa ua tali mai le IRB i ana lafoga

Ua talia fiafia e le afioga i le Alii Palemia, o ia foi o le taitaifono o le Iuni Lakapi a Samoa, Susuga Tuilaepa Sailele Malielegaoi, le tali mai a le International Rugby Board poo le IRB, e tusa ai o ni ana saunoaga na fai, lea e tuuaia e le IRB e faapea, e ogaoga ma tutui ana faamatalaga (alleged stinging comments).

I se tusitusiga i upega o fesootaiga mai le nusipepa a le malo, le Savali, na saunoa ai Tuilaepa e faapea, “Ua matuā ou fiafia lava ina ua latou (IRB) tali mai i a‘u faamatalaga na fai, pe i le auala na faauiga pe toe faaupu ai e le au fai lipoti (media) a‘u tala na fai.”

“O lona uiga, o lea la ua faato‘ā tau amata ona liuliu mai ma latou amanaia mai mea ua fia tausaga o tatou faaseā atu ai.”

E lei leva tele atu na agigia ai luga o tusitusiga a le aufaasalalau mai atunuu mamao nisi o faamatalaga sa faia e Tuilaepa i se tasi o ana faatalanoaga e faia i vaiaso tasitasi, i le gagana Samoa, i luga o le alaleo faasalalau a le atunuu, le 2AP. O loo tuua‘ia faapea sa faaigoa e le Palemia se laufalī ma ni tāfu‘a na fili mai e le IRB o ni tagata “faailogalanu” (racist) ma e “valea” (idiots), o i latou na faatautaia le taaloga a le Manu Samoa lea na fai talu ai nei ma le ‘au mai Sikotilani i le Apia Paka.

Saunoa Tuilaepa i lea lipoti, atonu ua soona faatelē naua e le aufaasalalau ana faamatalaga na fai. Na ia ta‘ua patino se tasi o nusipepa lea e faapea, o le nusipepa lena sa tusi sa latou lipoti ma soona faatelē naua ai ana faamatalaga. Fai mai Tuilaepa, afai la ua matuā faasefuluina ona toso faaumī e lea nusipepa lana tamai faamatalaga na fai faasaga i le IRB, ua matuā lelei lava lena mea ua latou fai. Auā o lona uiga, o lea ua avea le matuā faatelē o sana tala na fai, ma itu ua faateia ai le IRB ma amata loa ona latou tau amanaia mai mea ua leva ona tatou pisa pisa atu ai pea e faatatau i le leaga o le faatinoaga o galuega a latou laufalī, ma avea foi ma itu ua tuumāmāina ai taumafaiga fita a le Manu Samoa mai le tele o tausaga.

O le fiafiaga la o Tuilaepa e pei ona ta‘ua, ua avea si mea lea na toe lalaga atu nei, o le a maua ai loa se avanoa se‘i o latou fesagai ai ma le IRB ma toe fofola atu i ai o tatou lagona tiga ma le mafatia lea sa tatou mafatia ai i faaiuga a le IRB, aemaise lava i le tofiga o laufalī e faafoeina taaloga a le Manu Samoa.

Saunoa Tuilaepa, o le IRB lea e nafa ma le faalauiloaina atu o le taaloga i le lalolagi atoa, ae e toe solomua lava i laufalī nei e latou te faafaigaluegaina, ona toe faaleaga (spoiling) ai taaloga ma lē manaia ai mo tagata uma.

Na ta‘ua e le Afioga i le Palemia, o le tusi mai a le IRB ia te ia, o loo ‘faanoanoa i ana faamatalaga na fai’ (“sad towards my comments”). Fai mai a ia, o le mea e lē o silafia e le IRB, o ia e lua ona tofi o loo tauave.

O nisi taimi ua tu i lona tofi o le taitaifono o le Iuni Lakapi a Samoa (SRU), ae o le tele o taimi e tu ai i lona tofi o ia o le Palemia o Samoa. Peitai la na ia toe saunoa, o le a se‘i agai e fai sana malologa, ma se‘i taumafai e mafaufau poo le ā sana tala manaia e fai e toe faafiafia ai nai toeaiina (old fellas) o le IRB.