O le sauaina o fanau iti e lē gata o sauaga o le sasa o le tino ma sasa i upu ma tala, ae faapea foi fanau ua aafia i faiga tau feusuaiga fai faamalosi ma faaoogalima matagā. O le Toomaga mo ē Puapuagatia o le faalapotopotoga lea ua maualuga lona sao i le vaaia ma le puipuia o i latou.
O se teineitiiti lima tausaga sa sauaina i ni faiga tau faaoolima matagā ona o se gaioiga a se tasi o tamā e faapea o le tuagane o le tina o lona tina moni, poo le uncle o lona tina, ua nofo nei i lalo o le puipuiga ma le vaavaaiga a le Toomaga.
O le faaiuga lea a le faamasinoga i le talosaga a le Toomaga mo ē Puapuagatia mo se poloaiga tau le puipuiga lea e ta‘ua o le Protection Order. Sa teena e mātua o le teineititi le aveese o le la tama teine ona sa la faailoa i le faamasinoga o loo lelei atoatoa le la vaaiga o le la tama.
Sa la teena foi mau a nisi o le aiga o le tina o le teineitiiti sa faailoa ai e faapea e iai ni sauaga tau faaoolima matagā sa faia i ai i le teineititi e se tasi o le aiga o le tina, o se tamā e faapea o le uncle o le tina o le teineitiiti.
Peitai o le suesueina o le talosaga a le Toomaga mo se poloaiga tau puipuiga na talia ai e le faamasinoga mau na tuuina atu e ni sui o le aiga o le teineititi na lagolagoina le talosaga. O nisi o tuafāfine o le tamā (taofia le igoa) i Tanugamanono na molimau ma ta‘ua nisi o mea na tutupu i lo latou aiga i ni tausaga ua mavae.
O ia mea na tutupu e aofia ai le faia o ni uiga matagā e le tamā ua matua o loo tuua‘ia, i ni ona tuafāfine, o sona tausoga ma se afafine o se tasi o ona alo moni. O le tamā foi e pei ona molimau ia sui o le aiga sa falepuipui i Kalefonia i Amerika i le faiaiga faamalosi ma se tasi o ona alo (granddaughter).
O loo lisi foi le suafa o le tamā ua matua i le lesitala o tagata ua faamaonia solitulafono tau feusuaiga i le lesitala a le Malo Amerika mo ia tagata solitulafono.
Na faaalia e le tamaitai faamasino o Leilani Tuala Warren, sa ia sailia foi lea lisi i luga o fesootaiga televavave i computer, ma ia maua ai foi le suafa o le tamā matua.
Ua faamaonia ai e le faamasinoga mo mataupu tau aiga le family court, mau a sui o le aiga na lagolagoina le talosaga a le Toomaga.
Ua teena e le faamasinoga mau a mātua o le teineitiiti ma ua la lē toe vaaia le la tama teine, peitai o loo tatala le avanoa e asiasi atu ai i le nofoaga o le Toomaga o loo nofo ai i Tuanaimato.
Ona o le maaleale tele o faamatalaga o lenei mataupu aemaise o le va o tagata o aiga e faasino i le teineitiiti, ua lē mafai ai ona faailoa suafa e ui o loo avanoa ona faailoa e tusa o le faaiuga a le faamasinoga, seia vaganā le teineitiiti e lē o iai se faatagaga e faasalalau ai lona suafa ona o le laitiiti o ona tausaga aemaise o ona aafiaga.
