Ua sauni alii ma faipule o Siumu e toe finauina le latou talosaga i le Faamasinoga o Talosaga Apili, ina ua faaui i tua le tetee a le Loia Sili ae ua lagolago i le talosaga apili.
O le amataga o le vaiaso na tea nei na toe fofogaina ai lenei mataupu i le Faamasinoga Maualuga lea na faailoa ai e le itu a le Malo o loo tulai ai le Loia Sili ua leai se latou tetee i le talosaga.
O le Aso Lua, 18 o Me 2010 na toe fofogaina ai le mataupu i luma o le alii faamasino sinia o le Faamasinoga Maualuga o Vui Clarence Nelson, mo le faamautuina o se aso e toe suesue ai le faaiuga ua manumalo ai le talosaga a le Loia Sili e taofia le tuuina atu o le finauga a Siumu poo le strike out motion.
Faaalia e se tasi o tamalii o le itumalo le afioga Tapusalaia Lautogia atonu o se isi laasaga lelei lea o le finauga a lona itumalo o le a toe iloilo atili ai e le Faamasinoga o Talosaga Apili le faaiuga ua apo ai le finauga a le Loia Sili e tutusa le finauga a Siumu i eleele ma le mataupu a le afioaga o Vailoa Palauli ma le kamupani a Nelesoni.
E le o talia e le afioga Tapusalia Lautogia le iuga ua talia ai le strike out motion a le Loia Sili i lona manatu ua lē tausisia ai faigaupu i le va o Siumu ma le Malo ina ua faato‘ā amata faatulai mai le tagi a Siumu.
O loo mauaa le talitonuga o Siumu e ala i le latou talosaga tau eleele ua aveesea e le malo is e auala solitulafono o latou eleele. Faaalia e Tapusalaia Lautogia o se vaega o le feagaiga a Siumu ma le Palemia, ma le Minisita o eleele faapea le Loia Sili a le malo i le tausaga e 2000, sa saunoa manino ai le Palemia ia Siumu, ina ia ave le mataupu i le faamasinoga, afai e malo Siumu, e totogi e le malo tupe a tagata ia ua faatau o latou fanua ae faafoi eleele o Siumu, ae o lea ua tagi le Loia Sili ina ia aveese le talosaga a Siumu, ma ua tuuaia ai e lea matai le Palemia i le lafilafi ae ua lē tausisia faigaupu ma tuugatala na iai.
E talitonu Tapusalaia Lautogia e ese le auala na nofoia ai e Aiono gauta o Siumu ma o loo malamalama lelei foi lea tamalii ma lo latou aiga i tuutuuga na faia ma Siumu. Ua finau lea tamalii e tatau lava ona fai se faamasinoga a lona itumalo ma le malo ae lē o le manao e faapogisa le atunuu.
O loo talitonu foi lea tamalii e le tutusa le mataupu o eleele o Siumu ma le faamasinogga i le va o le kamupani a Nelesoni ma Vailoa Palauli.
Faaalia e Tapusalaia Lautogia o eleele o le Itumalo o le ola o le nuu, afai o le a lē faia se faamasinoga ua avanoa loa lona itumalo e tuli ese tagata ia o loo nofoia elelele o Siumu.
Ua faaalia e le Faamasino Sili i le fofogaina muamua o le talosaga apili a lea itumalo, e lē fesiligia le faia o sana faaiuga e talia ai le talosaga lenei mo le tuuina atu i le Faamasinoga o Talosaga Apili, ae manaomia le faamautu muamua o nisi o vaega e pei o le tali mai a le Loia Sili i le talosaga apili, ona faato‘ā mautu ai lea o sana faaiuga ma o le Aso Gafua nei e iloa ai lea tulaga.
