Ua galo uma le tigaina ma le tele o fita sa feagai ma le Manukau Pacific Island Trust ina ua toe maua le aso nai Moamoa e militino faatasi ai ma ana faalapotopotoga sa latou galulue faatasi i lenei taussaga.
E ui i le eseese o gagana ma atunuu ae ua avea lea aso ma avanoa e fiafia faatasi ai tagata uma o atunuu taitasi e siitia le viiga ma le faafetai i le Atua ina ua faaiuina ma le manuia galuega sa feagai ai i lenei tausaga.
E lē gata i lea o se laolao e momoli atu ai le agaga faafetai a le Manukau Pacific Island Trust i faalapotopotoga uma sa latou galulue faaatasi, e pei o Tonga, Maori, Niue Fiti faapea ma Samoa.
O le Aso Faraile ua mavae i le 10 le taeao na faatumulia ai le East Tamaki Community Hall i mātua matutua faapea sui o faalapotopotoga sa soosoo tau‘au faatasi ma le Manukau Pacific Island Trust i galuega fai o le tausaga, e patipatia ai le alofa o le Atua e ala i galuega faatino sa feagai ai.
O le loto faagaeetia ma le agaga o le fiafia sa molimauina e atunuu eseese sa auai ina ua tulai le susuga i le faafeagaiga ia Fatu Matai‘a e taitai le sauniga e amata ai le polokalame. Ona saunoa lea o le taitaifono ia Laifai Toetu Iose e faafeiloai le mamalu o atunuu.
O le CEO o le Manukau Pacific Isaland Trust le faletua ia Lupe Tofilau Eti Alesana na ia faailoa suafa o i latou o loo galulue i totonu o lenei faalapotopotoga, faatasi ai ma le fofogaina o le ripoti faaletausaga.
Na sosoo ma faafiafiaga matagofie na pese ai le alii o Elevisi Samoa faapea le siufofoga mālie o Tenari Tautua. O le mālie o musika tu‘itu‘i o le faili na maua ai le avanoa o tagata matutua e maua ai le faamalosi tino, ae ua fiafia faasoloatoa ai tagata uma mai atunuu eseese e militino faatasi ai e pei o se aiga e tasi.
O le taualuga o le aso na faaiu i le taumafataga tele na saunia e le faleaiga o le Paradise Catering ma saunoa faaiu ai le fofoga o le aso le tofa ia Laifai Toetu Iose e momoli le agaga faafetai i faalapotopoto uma sa auai i lea aso.
O lenei faamoemoe, o se tofa na a‘e i le Komiti Faafoe a le Manukau Pacific Island Trust ina ua mae‘a ni semina se fā sa faatinoina i lenei tausaga. Ma o lenei polokalame ua faaigoaina o le Community Education Programme e tailua masina ma fai i le tausaga, e ese mai le tele o galuega o loo latou galulue ai.
O le tumutumuga o lenei polokalame ia maua e aiga le maloloina, aiga fiafia ma se aiga saogalemu aemaise lava le sauaga i totonu o aiga.
O nisi vaega o loo tautua ai lenei faalapotopotoga o le faia lea o polokalame i le Pre School i nisi o masina, ae faapea foi i tagata matutua auā e iai le lagona, o isi tagata matutua o loo latou tausia tamaiti, auā e iai fanau ma fanau a fanau, ina ia latou malamalama i tulafono faatonutonu (regulations) ma aiaiga a le malo i le faatinoina o na tiutefai.
