Susuga i faiaoga ma fanau aoga oloo auai ile malaga i Samoa

Susuga i faiaoga ma fanau aoga oloo auai ile malaga i Samoa

Ole aso 28 ole masina lenei o Setema, o lea ua fuafua ai e tuua ele aumalaga ale aoga a Southern Cross Campus laufanua o Aotearoa ae asiasi atu i laueleele o Samoa auā lava le fia sailiili pea ile olaga sa ola mai ai o latou mātua ma aiga i Samoa. E 38 le aofaiga ole aumalaga, e aofia ai tamaiti aoga e 18 faapea faiaoga e toaiva faatasi ai ma mātua.

Ole toatele o fanau aoga Samoa nei oloo auai ile malaga, o i latou sa fananau iinei i Niu Sila, ole tele foi la o i latou nei e lei vaaitino ile olaga Samoa sa ola ai o latou mātua a’o lei malaga mai i nei atunuu. O lea ua a’e ai se lagona o susuga i faiaoga Samoa ma mātua oloo galulue ma faamaopoopoina le fanau Samoa i totonu o lenei kolisi, e tatau ona fai ma malaga fanau aoga i Samoa se’i latou vaavaai ma iloa le olaga ole Samoa moni.

Ole tele o gasesega o taumafa i atunuu i fafo ua faatino lava i ogaumu a papalagi oloo i totonu o fale, ae ole naunautaiga o faiaoga ma mātua se’i silasila manino lava fanau ile umukuka ale Samoa moni oloo gasese ai a latou meaai, faatasi ai ma le sailiili i nuu oloo iai tala ole vavau ma lona mafuaaga ma le uiga. O tu ia ma aganuu a Samoa e ao lava ona faailoa i fanau ina ia latou malamalama ai ile olaga sa iai mātua i aso ua mavae, e lei faigofie le olaga sa amata mai ai.

Ua iai le faamoemoe e taunuu le malaga i Samoa, ona feiloai lea ma le ofisa o Turisi ile 10 ile taeao, a mae’a lena, ona malaga sa’o lea i Falelatai, o iina e feiloai ai ma le Ao ole malo o Samoa le afioga ia Tuimalealiifano Vaaletoa Sualauvi II ma lana masiofo, ile mafutaga mafanafana ale afioga ile Ao ole Malo ma lenei kolisi pe a malaga mai i Niu Sila nei, lea ua maua ai le avanoa e talimalo ma feiloai ai le Ao ole Malo ma le aoga a Southern Cross Campus i laufanua o Samoa.

  Ole a maua foi le avanoa e faafiafia ai ile faletalimalo lauiloa i Samoa le Taumeasina Island Resort, ona asiasi lea ile matafaga ole Parataiso, ma nisi o nuu i tua i Tafatafa ma Matafaa. Ole kolisi i Leulumoega i Apia ma le kolisi o Tuasivi i Savaii, o aoga ia ole a mafai ona galulue faatasi ma le kolisi o Southern Cross Campus i Samoa a’o iai ile latou malaga, o le a latou asia foi le nuu o Falealupo ma Tufutafoe ile mea oloo iai le tele o talatuu ma tala ole vavau o Samoa, ile mafuaaga ma le uiga moni o nei tala mai anamua. Na’o le 13 aso ole malaga ae oloo taumafai faiaoga ma mātua e faasoasoa uma polokalame ale aumalaga i totonu o nei aso a’o lei toe taliu mai i Niu Sila.

Ole tapenaga ole malaga, oloo tagi lava i lima o mātua ma faiaoga faapea le fanau, e fai a latou sailiga tupe e ala i sosisi faatau, faatasi ai ma le fesoasoani ale aoga ae sili ai ole tutū malosi atu o mātua e lagolago lenei faamoemoe.

Ole po ole Aso Faraile ua mavae, 8 o Setema, lea sa faia ai le latou koneseti tele ile hall ale kolisi i Magele auā lava le saili seleni e fesoasoani ai ile malaga. Na auai nisi o sui o vaega faaupufai e pei ole One Pacific Party faapea le afioga ile faipule o Magele ia Aupito Su’a William Sio, faatasi ai ma mātua ma aiga sa opogiina le faamoemoe ole fanau.

Ole fofoga ole po ole afioga ia Fepuleai Tofiga, ae ole faipule o Magele ia Aupito Su’a W. Sio, na saunoa faafetai ile mamalu o mātua ma faiaoga e tusa ai ma le valaaulia, faatasi ai ma le faamanuiaga i tapenaga ale Kolisi mo Samoa.

Na tali foaitau le taitaifono o mātua ale aoga ia Fuamai Tafa Muavaa ile saunoaga ale faipule faatasi ai ma lana faafetai ile mamalu ole auvalaaulia ile faamalo’ulo’u atu e tali le valaau mai ale kolisi.

O nisi o alo Samoa sa faapea ona tuu atu lo latou tau’au e lagolagoina ai le polokalame ole po, ole susuga ia Vaipapa Maota ole One Man Band, Priscilla Gatoloai, Punialavaa, Grace Ikenasio, Tatau Dance Group, Koru School Band faatasi ai ma le ausiva mai Tonga auā ole faaiuga ole vaiaso lea sa tapunia ai le faatāuaina ole vaiaso ole gagana a Tonga, ma taualuga ai loa le po i faafiafiaga ale fanau aoga lea ua fuafua e malaga i Samoa.

Comments

comments