O le aso a taeao (Aso Lua) o le a fono ai sui o alii ma faipule o le afioaga o Fusi i Safata ma le Minisita o le Soifua Maloloina, le Afioga Tuitama Dr Talalelei Tuitama, e faamautu ai pe toe fausia se falemai faaitumalo i Fusi Safata pe leai.
O le fautuaga na tuu atu i se asiasiga a le Alii Minisita i le tausaga na tea nei ina ia sii le falemai faaitumalo ua matua tuai ma faaleagaina i le aai o le afioaga i le pitonuu a uta.
E 10 eka o se lisi a le Malo lea ua lua masina o faalauiloa i faasalalauga e le afioaga ma o le manatu o le afioaga, o le faatonuga e sii i uta le falemai, ua faamautu ai le manaoga lea o le Malo. Peitai talu lea faatonuga e lei toe iai se isi feutagaiga.
O loo faaaoga lava vaega o loo malu o le falemai faaitumalo tuai o loo i le aai.
E le o mafai ona taofia ai se gasegase ona o le leaga o fale ae o loo faia siaki tai vaiaso e fomai ma tausi soifua o loo galulue i le falemai faaitumalo o Poutasi i Falealili. E foliga mai o le falemai lea ua faaaoga nei faaitumalo e Falealili, Siumu ma aofia atu ai ma Safata. E iai foi se faletalimalo laitiiti, poo se sub-centre o loo i Saanapu.
O le faamatalaga a sui o le afioaga o Fusi ua le manino pe faaauau pea le auaunaga mai i Fusi pe leai ae o lea o loo faaaoga lava le falemai faaitumalo lea e i le aai a o lea foi ua iai le fuafuaga e faaaoga le fanua o se tasi o aiga o lo latou nuu, lea e i gauta ma ua faasalalau le lisi a le Malo.
O le Aso Tofi o le vaiaso na tea nei, na agai ai tina o le Komiti a Tamaitai o le afioaga lenei i le Alii Palemia, ona o le manaoga lava e tasi e momoli atu i le taitai o le Malo, o le faaauau o le falemai faaitumalo i le afioaga.
E lē o iloa lelei lava pe aisea ua agai mai ai tina aua o lea ua iai le fonotaga ua mae‘a ona faamautu ma le Matagaluega i le vaiaso lenei ma alii ma faipule.
E ese foi feeseeseaiga ua tulai mai i le va o le saofaiga a alii ma faipule ma le Komiti o Tina ma Tamaitai. Na faaalia e sui o alii ma faipule, na fai lelei le faaiuga i le fono a le nuu e tuu atu i le pulega a alii ma faipule e momoli le manaoga o le nuu, ma ia taumafai e saili se tali a le Malo, ae e foliga mai ua le fia faatalitali tina i se tali ae ua agai lava i latou e saili mai le tali a le Malo. Sa iai se feiloaiga a tina ma le Palemia i le Aso Lulu ma ua toe taatia mai nei i le isi feiloaiga lea e faia i le aso a taeao ma le Matagaluega o le Soifua Maloloina.
Faaalia e alii ma faipule, e taua le ta‘u mai ia i latou pe oo se falemai faaitumalo pe leai, ae sei toe foi fanua o aiga o loo ua faaaoga i ia falemai. Ua silia i le 50 tausaga talu ona faatu le falemai faaitumalo o Safata i fanua i le aai o Fusi Safata ma na ta‘ua e le nuu e oo mai i le aso, e lei iai se taui ua tuu atu i le aiga e ana lea fanua. E ui o lea ua lisi le fanua o le isi foi aiga i Fusi lava ae o lea ua le mautonu pe taunuu lea falemai pe leai.
O le taimi lenei ua tapunia le tele o sub-centres ona o le manatu o le Malo e tatau ona ave le faataua i falemai faaitumalo ae na o Safata o loo iai lona sub-centre ae ua tulaga faaletonu lona falemai faaitumalo. E tatau ona iloa taeao poo le a se finagalo o le Malo i lea fuafuaga a le afioaga o Fusi.
