Ua faaleo le faanoanoa o le afioga i le tamaitai faamasino le afioga Mata Keli Tuatagaloa i le mafai ona tatala pea i tua o le alii pagota o Peika Pesa poo Peika Pesaleli ua 38 nei tausaga o lona soifua, ae o loo fausasaga solitulafono eseese sa molia ai ma faamaonia o loo tuli ai ona faasalaga i le falepuipui.
O Tesema o le tausaga ua mavae i le taimi o aso fiafia o le Kilisimasi na tatala ai Pesa e fai aso fiafia i lona aiga, peitai o le aso 26 o Tesema 2017 na molia ai e leoleo faatasi ai ma se isi taulealea i le umia o laau faasaina. O le Aso Lulu o le vaiaso na tea nei na tulai ai Peika mo le suesueina o moliaga ia, peitai na faailoa ai e le faamasinoga se lagona sa lē tatau ona toe tatalaina i tua lea tagata nofosala.
O le alii pagota o loo tuli faatasi ona faasalaga i le falepuipui i solitulafono o le talepe fale, gaoi, faaoolima, umia o laau faasaina, faiga o ni uiga matagā, ma le sola ese ma le falepuipui. O lona uiga ua faaopoopo isi faasalaga i luga o isi faasalaga faafalepuipui ma lē maua ai se taimi tonu e magalo ai, aua e le o muta le molia pea o Peika pe a oo ina maua lona avanoa e alu ai i tua.
O faasalaga o loo tuli e faatoa magalo ai le pagota i le tausaga e lua afe ma le 29. Na amata nofosala o ia i le falepuipui i le tausaga e 1996 ina ua 16 ona tausaga, ma e lei magalo lava talu mai lena taimi. O lona uiga ua 22 tausaga o nofo sala i le falepuipui Peika Pesaleli. O le fesili tuusa’o a le tamaitai faamasino i le pagota pe o toe iai sona lagona e fia foi i lona aiga pe ua fiafia lava i le sau i tua ma solitulafono ma toe alu i le falepuipui.
E lei tuuina atu se tali a le pagota i le fesili lea ona ua fautuaina e alu ma mafaufau lelei iai. O le alii pagota lenei mai Toamua, o Tafaigata, Pu’apu’a ma Salailua e masani ona sola i tua ma le falepuipui. Sa sailia foi i se isi ana solaaga ma toe maua e leoleo ma momoli i le falepuipui.
Na fesiligia le afioga i le Minisita o Falepuipui le afioga Tialavea Tionisio Hunt i le tatala i tua o Pesa, ae o lana tali e iai lava aiaiga ma mafuaaga talafeagai e mafai ai ona tatala i tua se tagata nofosala. Na ia faaalia foi o le faaiuga na faia e Aso Sa Peika i lona aiga ia Tesema o le tausaga ua mavae ona o le special leave poo se faaiuga faapitoa ona o le taimi o le Kilisimasi.
E aso 25 le Kilisimasi o le 2017 ae o le aso na sosoo ai ae maua e leoleo Peika o umia lala ma lau faapea fatu o le laau faasaina o le maruana.
Ua toe tolo le suesueina o ona moliaga o le umia o laau faasaina i le vaiaso nei ona e lei oo atu le molimau autu a leoleo.
