Fetuia‘i le Ofisa ole NPO male Loia Sili ale Malo

Le Loia Sili ale Malo, afioga Lemalu Herman Retzlaff
Le Loia Sili ale Malo, afioga Lemalu Herman Retzlaff

Ua masua mai i fafo ini pepa o faamatalaga faalauaitele mai le Loia Sili ale Malo male Ofisa oloo nafa ma mataupu tau solitulafono se feteenaiga o manatu male faamatalaina ole tulafono faavae ale atunuu oloo faatonutonu ala ile faatinoga o tiute ma matafaioi a nei itutino tāua ole Malo.

Ole faailoa ele ofisa ole Loia Sili ole filifilia oni loia mai Niu Sila e nafa male finauina o moliaga ole Komesina o leoleo male Faatonu ole ofisa e nafa ma solitulafono, na aumai ai ma se pepa o faamatalaga mai le ofisa ole NPO poo le National Prosecution Office ile afiafi ole Aso Gafua ua mavae ma faailoa mai ai ua toe soalaupule lenei mataupu male Loia Sili, ma ua faamanino ai o teuteuga ole faavae ua lē toe umia ele Loia Sili ni malosiaga e pei ona sa iai muamua, nate filifilia ma tofia ai se isi loia e manao iai, e ese mai loia ale Malo e nafa male tauaveina oni moliaga solitulafono.

O ia malosiaga uma e pei ona faaalia ua i lalo ole ofisa e feagai ma solitulafono ma ole a faapena foi ona finauina ele ofisa moliaga ole Komesina o leoleo. Ua faaalia ele ofisa ole NPO e leai se latou faamatalaga ile aumaia ose loia ese e tulai mo moliaga oloo molia ai le faatonu ole latou ofisa le tamaitai loia sinia o Mauga Precious Chang.

Na faaalia foi i lea faasalalauga ua ioe atu le Loia Sili ale Malo le afioga Lemalu Herman Retzlaff ile toe faamaninoga o lenei mataupu ma ua ia faailoa foi ole a lē toe aafia ise vaega o nei mataupu e lua ua i luma nei ole faamasinoga.

E lei tuanai se fā itula talu ona oo mai lea faaaliga mai le ofisa oloo nafa ma solitulafono, ae taunuu le pepa o faamatalaga mai le ofisa ole Loia Sili ale Malo ua tali ai i lea faasalalauga.

Ua faaalia ele Loia Sili ole faia ole amiotonu ina ia mautinoa e lē faatogafalea ma ia tausisia taiala ole faimea tonu male mautali atu, ole mafuaaga lea ole aumai ose loia mai fafo e nafa male mataupu faasaga ile Komesina o leoleo.

Ua faaalia ai foi ole finagalo lea ole Minisita ole ofisa e nafa ma solitulafono. O lea Minisita ole Palemia ae e lē o faailoaina ile pepa o faasalalauga mai le Loia Sili ale Malo. Ua ta‘ua ai foi ole faailoa ele tamaitai loia ua avea nei ma sui faatonu ole ofisa e nafa ma solitulafono ole tauaveina pea e lona ofisa o moliaga ole Komesina o leoleo, ua lē tusa ai ma aiaiga ole tulafono faavae pe a aafia lea ofisa ose itutino ole malo e faamalosia le tulafono.

Faaalia ele Loia Sili le afioga Lemalu Herman Retzlaff, e lē talafeagai ele ofisa ole NPO ona ia finauina moliaga ole faauluuluga ose isi itutino ole Malo, o lana foi lea pitolaau ole faamalosia ole tulafono ma finauina le faimea tonu.

Le sui Faatonu ole ofisa o mataupu tau solitulafono le National Prosecution Office le tamaitai loia sinia o Mureil Lui ma se tasi o tamaitai ole atunuu e lei leva tele atu nei ona faaofi i galuega ale faamasinoga a le atunuu
Le sui Faatonu ole ofisa o mataupu tau solitulafono le National Prosecution Office le tamaitai loia sinia o Mureil Lui ma se tasi o tamaitai ole atunuu e lei leva tele atu nei ona faaofi i galuega ale faamasinoga a le atunuu

Ua faaalia ele Loia Sili ua ia logo ile sui Palemia oloo tauaveina tiute ole Palemia ile taimi nei le tulaga na ioe ai le Minisita e aumai ni loia mai fafo ina ia tausisia ai le faia ole mea tonu ma ua finagalo malie foi iai le sui Palemia le afioga Fiame Naomi Mataafa.

Ua aliali mai i lenei feteenaiga o itutino tāua nei e lua ole Malo e faamalosia le tulafono ma faatino tulaga uma ina ia mautinoa e faia le amiotonu, e lē o ogatasi le futia male umele ile va ole Loia Sili ale Malo ma lona ofisa, male ofisa e nafa ma solitulafono le National Prosecution Office.

E aliali mai foi i nei fefaaalia‘iga o malamalama ma silafia ile faamatalaina ole tulafono faavae oloo aiaia ai tiute ma matafaioi o nei ofisa e lua ole Malo oloo feteenai ma fetuiai.

Ole Aso Gafua ole vaiaso nei e toe tulai ai le Komesina o leoleo, ae ole Aso Lua tulai le faatonu ole ofisa o nafa ma solitulafono, mole valaauga muamua o ona moliaga o solitulafono tau taavale afi.

Faaalia ese loia sinia lona lagolagoina ole finagalo ole ofisa ole NPO, ile lē toe iai oni malosiaga faaletulafono o toe umia ele Loia Sili ale Malo, nate filifilia ai se loia poo ni loia e ese mai loia ale Malo e feagai male finauina oni moliaga solitulafono ose tagata faigaluega ale Malo e tuuaia ini moliaga solitulafono.