“Lau afioga i le Fofoga Fetalai, ou te lē talia teuteuga ua aumai”…Papalii Niko Lee Hang
O teuteuga ua faataatia e le Malo i le Palemene mo le toe teuteuina o nisi o vaega tāua o le Tulafono o Faigapalota a o lumanai le isi faigapalota tele a le atunuu i le tausaga e 2016, e lei faigofie ona talia e le toatele o faipule e lē gata i le itu a le Malo a o le itu o loo agaia le Malo.
E mafua ona o ni suiga tetele e manatu faipule na maua le avanoa e saunoa ai, o le a tulai mai ai ni aafiaga i o latou itumalo faafaipule. O sui faipule o le au palota taitoatasi susuga Papalii Niko Lee Hang, ma le afioga Maualaivao Pat Ah Him sa manino o la atugaluga i le teuteuga o le a soloia ai nofoa o le au palota taitoatasi i le Palemene.
O atugaluga o sui faipule nei e toalua ona e lei maua se taimi e feiloai atu ai i tagata palota o o la itumalo ma faailoa i ai le manaoga o le teuteuga pe latou te talia. O loo finau nei faipule o loo toatele pea tagata palota mo le au palota taitoatasi.
Peitai o lea ua suia nei i le faaopoopo o itumalo tu taulaga e lua. Tasi mo le Vaimauga ma le tasi i Faleata ona agai lea i ai o i latou o loo nonofo i fanua umia saoloto o loo nonofo i nei itumalo e palota ai. O le finagalo o Maualaivao Pat Ah Him, e leai ma se isi o le Kapeneta na musumusu atu ia te ia e faatatau i teuteuga ma ua faate‘ia ai o ia.
O le faipule o Siumu le tofa Tuuu Anasii Leota na ia folasia i le Palemene e faapea e lei faatalanoaina muamua teuteuga i totonu o le latou faafaletui aemaise o lona talitonuga o le Malo o loo aofia ai Minisita o le Kapeneta ma minisita lagolago.
O le taitai o le Itu Agai le afioga Palusalue Faapo II na ia finauina le tatau ona faatelegesegese fuafuaga a le Mao i le pasia o teuteuga ona e tele se aafiaga o itumalo aemaise e lei tai tai le palota o le 2016 a o lea ua faanatinati le tuuina atu o teuteuga ina ia pasia e aunoa ma le tuuina atu i se komiti faapalemene e avanoa ai ni finagalo o le atunuu e faaalia a o lei pasia.
O le tele o manatu fetotoa‘i o sui mamalu o le Palemene, na toe tulai ai le Palemia ma faatū se lafo ina ia tagofia le tulafono i tulaga masani o le mae‘a o le faitauga lona lua ona faasee lea i tulaga faakomiti e toe iloilo ai.
Na faafetaia ai loa e sui mamalu o le fono aoao faitulafono le toe tafa o se finagalo o le Malo.
O le tuuina atu o teuteuga i se tulaga faanatinati na faia ina ua saini le aao o le Ao Mamalu o le Malo mo le faia o lea tulaga. Peitai sa fesiligia le saini aao a le Ao Mamalu e aunoa ma le ave o teuteuga i se komiti.
Na tulai ai le Sui palemia ma ia faamanino e lē tatau ona tuua‘ia le Ao o le Malo ona e faapea nisi o finagalo o ia ua mafua ai ona faanatinati. Na faaalia manino e le Sui palemia o le ioega a le Kapeneta na faia ai le faaiuga e faanatinati le pasia o teuteuga, ona tuuina atu lea i le Ao o le Malo mo lana ioega i luga o le fautuaga a le Palemia ma lana Kapeneta.
Ua aiaia i teuteuga fou le soloia o nofoa e lua o le aupalota taitoatasi, le faatūina o itumalo faapalota fou e lua e ta‘ua o itumalo tu taulaga poo urban seats.
Ua aiaia foi i teuteuga le lē toe iai o ni nofoa tailua mo nisi o itumalo ae ia vaelua, ma avea o ni itumalo e tasi lava le tofi faipule. O se isi teuteuga o loo manaomia ai le faamaonia o agavaa o se sui tauva e fia tausinio i le palota mo nofoa o le Palemene e se alii poo se tamaitai loia.
O tagata palota o loo aiaia pea le faamaonia o o latou tulaga agavaa e se tofi Pulenuu lea ua suia nei o le sui o le Malo i le nuu. E iai ma nisi o teuteuga ae o vaega tetele lava ia o loo fesiligia e faipule na mafua ai ona vavao le palemene i lena vaiaso ua mavae.
Ua pasia nei teuteuga i le faitauga lona lua ma ua faasee atu i se komiti faapalemene mo le toe lauliliuina ma faaleo ai ni finagalo o le atunuu lautele. O le fuafuaga a mae‘a pasia nei teuteuga ona see atu lea i se taimi e teuteu vaega o le faavae e avanoa ai ona faatino teuteuga o le tulafono o faigapalota.
