O le soifuaga faa-Samoa ua tatou iloa ma silafia le faavasegaina o itu uma mai lava i Tamalii ma Failauga, o Faletua ma Tausi, le aualuma ma le aumaga e ese foi le vaega o le tinifu poo fanauiti. O le faavasegaina foi o suli moni o se aiga, ma isi ituaiga o suli ua manino i le tatou tu faa-Samoa.
O tina ma tamaitai i lona tulaga aoao tetele ua talanoa mai ai le Komesina o Sulufaiga ma lona ofisa i le lipoti muamua o aiā tatau ua saunia e tagata Samoa mo Samoa lava ia.
O se galuega na faatino e o tatou lava tagata lea ua manino mai i se sailiiliga na faia le tele o vaega o le tatou tu ma le aganuu o loo feteenai lona faauigaina ma le faamatalaina ma le mataupu i aiā tatau o tagata soifua uma.
Ua faaalia i le lipoti atugaluga ma fautuaga e poupou ai ni vala ma ni faaletonu o loo oia ai aiā tatau o fanauiti, aemaise o tina ma tamaitai. O loo talanoa mai le lipoti i se tulaga aoao tetele e mafua ona o nisi o vaega e lē o sagatonu ma le faatulagaina o aiā tatau. O nisi nuu e lē mafai ona faaee se suafa matai i se tina ma se tamaitai.
O nisi nuu ua matai le ituvai o tamaitai ae e lē mafai ona i totonu o le saofaiga a matai o loo faia le nuu, ma e tele mafuaaga o loo faaalia i le lipoti e mafua ai.
O tina nofotane ma le sauaina o a latou aiā tatau i totonu o aiga o a latou tane o se isi lea vaega o loo afea i le lipoti a le Komesina o Sulufaiga. O le otootoina o lea sailiiliga ua lomia i lenei lipoti ina ia mafai ona maua i ai se silafia o le atunuu:
Tina ma Tamaitai
Mai le Suesuega ma sailiiliga, e tolu mataupu fesootai na tulai mai e uiga i aiā tatau a tina ma tamaitai: (1) lotea o manatu taatele i nafa o itupa; (2) amanaia e lē o tutusa le auai i upufai o malo ma le olaga tau tamaoaiga; ma le (3) taofiina o le maualuga o le tulaga o sauaga i tina ma tamaitai.
O manatu taatele o loo iai e uiga i nafa o itupa, e faalavelaveina ai le auai o tina ma tamaitai i le tele o vaega o le olaga, aemaise lava tamaitai nofotane. O i latou ia e aupito aafia.
O faatalanoaga i vaega o tina, tamaitai ma teine, na lāgā soo ai le tulaga o le aunofotane i le itu la o le sauāina e a latou tane poo tina o a latou tane. E leai se fofo na maua mo lea tulaga. Ina ia ausia le tulaga tutusa o itupa, e manaomia le aveesea o manatu o loo iai e uiga i nafa ma matafaioi a tina ma tamaitai. E tāua le faamanatu atu, “E au le inailau a Tamaitai.”
O Samoa o se atunuu e aofia i atunuu e aupito maualalo le faatulagaga i le lalolagi (lona 131 o atunuu e 139) i le tulaga o le auai o tina ma tamaitai i upufai o malo. Talu ona tutoatasi le malo o Samoa i le 1962, e i lalo lava o le 10% le aofai o sui tamaitai i le Palemene.
‘O le aa faamamalu i le palota o le 2016 le Tulafono o Teuteuga o le Faavae 2013, o loo manaomia ai ia 10% o sui o le Palemene, o tamaitai. Ina ia mafai ona oo i le ta‘ele o mafuaaga o le lē tutusa o le tulaga o le auai, e tāua le tagai ma fai se galuega i mafuaaga o loo taofia ai tina ma tamaitai i totonu o nuu.
E tusa ma faamaumauga o Fuainumera Faamaumauina o le 2011, na o le 11% o matai o tamaitai. E manatu le Ofisa, vaganā ua foia le tulaga o le mafai e tamaitai ona fai faaiuga i totonu o nuu, o le a tumau pea ona avea ma lu‘i le toaitiiti o sui tamaitai i le Palemene.
O feutagaiga na faatino e le Ofisa na iloa ai, e iai lagona o tina ma tamaitai o le lē agavaa i le faiga o faaiuga. Afai e lagolagoina tina ma tamaitai e taitai (pe aofia foi) i faigā faaiuga i nuu, o le a faapea foi ona o latou maua le to‘a e taitai ai i le Palemene.
O se itu lelei e faailoa atu, o le maualuga lea o le aofai o pisinisi i taulaga e umia pe pulea e tina ma tamaitai. O Samoa, e tali tutusa lava le faatusatusaga o tina ma tamaitai e i tulaga o pulega ma tulaga ogatotonu o pulega i galuega a le malo ma le faatusatusaga o tina ma tamaitai i galuega aloaia (e lē aofia ai galuega e faatino i lima), e toeitiiti lava tutusa ma alii.
Peitai, e ui ina iai itu lelei e fia faamati‘e o le tulaga o tina ma tamaitai i taulaga, e lē maua e tina ma tamaitai o nuu i tua avanoa e faigaluega ai, e pei ona maua e i latou e nonofo i taulaga. O le tele o avanoa faigaluega mo tina ma tamaitai Samoa e maua i le vaega o galuega lē aloaia.
E tusa ma le faamatalaina e le Faalapotopotoga o Galuega a Malo Aufaatasi (International Labour Organisation), ni isi o uiga o le vaega o galuega lē aloaia, e aofia ai le leai o se puipuiga pe a lē maua se totogi mo galuega na faatinoina, faamalosia ona galulue i itula e sili atu i taimi faigaluega masani poo itula faigaluega faaopoopo, faamalolo mai galuega ae lei iai se lapataiga ma e leai foi se taui, e lē saogalemu nofoaga e faigaluega ai, ma e leai ni faamanuiaga e pei o penisione, totogi mo aso ma‘i poo inisiua pe a ma‘i tina ma tamaitai ma isi vaega o tagata faigaluega e aafia gofie ma e lē talia i isi avanoa ma galuega, o i latou ia e leai se isi filifiliga e mafai, na o le faigaluega i galuega ia e lē aloaia ma e maualalo le tulaga.
Ina ia siitia le tulaga o tina ma tamaitai, e tatau lava ona o latou maua avanoa e auai i galuega tau tamaoaiga, ma galulue i ni galuega e maua ai totogi talafeagai.
O le itu mulimuli, o se popolega tele lea ona o le lē lava o faamatalaga ma fuainumera fa’amauina e uiga i le maualuga, uiga, lautele ma mafuaaga o sauāga i tina ma tamaitai.
O le lē lava o faamatalaga ma fuainumera faamauina, e lē atoatoa ai foi le faatinoga o le faamamaluina o tulafono o loo iai. Na lagona le faanoanoa i le laitiiti ma le lē atoatoa ona tuuvaega o faamaumauga na maua mai i le Vaega o Sauaga Faalotoifale o le Matagaluega o Leoleo.
E lē mafai ona folafola atu e se malo lona lagolagoina atoatoa o le faamutaina o sauaga i tina ma tamaitai, pe afai e lē faatāuaina e ana leoleo le aoina o faamatalaga ma faamaumauga o sauaga faalotoifale ma sauaga o faiga aiga faatāutala, ua faavasegaina i itupa, tausaga o le matua, atunuu ma le sootaga i le va o lē na aafia ma le tagata na faatinoina le sauaga.
E ui ina ua iai faiga mo aiā tatau a tagata soifua e pei o—tulafono, faiga fa’avae, ma feagaiga faavamalo – e mafai ona faaaogā e mata‘itū ai faatinoga o matafaioi a Samoa i lalo o ia feagaiga, e iai tapulaa o tulaga e mafai ona ausia e tulafono.
E tatau ona tino mai suiga i le aganuu ma faiga masani, e pei ona iai suiga i le tulafono. E tatau ona talatala ia matala ma fofo le gasegase o loo iai nei o le faataligatuli poo le pō o le silasila i le mataupu o sauaga o loo faatino i tina, tamaitai ma teine, semanū e lei talalautasi le nofoa maualuga na faatietie ai e le aganuu a Samoa ona tina ma tamaitai.
O a tatou Fanau
“Mai le Suesuega ma sailiiliga, e iai ni mataupu na tulai mai e tatau ona faatino i ai ni galuega i le laasaga o nuu faapea le atunuu atoa: (1) aveesea o manatu sese o loo iai i le faauigaga o aiā tatau a le tamaitiiti; (2) tuuina atu avanoa ia mafai ona auai i aoaoga talafeagai; (3) lōtea le faafaigaluegaina o tamaiti; ma le (4) taofiga o sauaga, e aofia ai faiga aiga faatautala ma le mataifale.
O feutagaiga ma fefaasoaa‘iga ma nuu ma taitai o ekalesia, na aliali a‘e ai le taatele o le faauigaseseina o aiā tatau a tamaiti i Samoa. E foliga mai e tolu ni itu o loo mafua ai. Muamua, o se popolega na faaleoina soo e faapea, o aiā tatau a le tamaitiiti e maua ai e tamaiti le saolotoga e fai ai amio sese ma lē usitai ai i mātua atonu o se taunuuga lea o le faaliliuina o le faaupuga “human rights”.
O lona lua, o le tulaga masani i totonu o le aiga Samoa, e usitai tamaiti i o latou mātua, e leai ni faatalanoaga.
O lona tolu, ua faauiga sese foi e tamaiti ia a latou aiā tatau, ma ua faaopoopo lea i popolega na lāgā e mātua”.
“Ua faaalia manino le ausia e Samoa o le maua e tamaiti uma o aoaoga i aoga tulagalua, e ala i le Polokalame Fesoasoani a Samoa mo Pili Aoga (the Samoa School Fee Grant Scheme).
E lē gata i lea, ua faatino e Samoa se galuega e sili atu i ana matafaioi i lalo o le Feagaiga i Aiā Tatau a le Tamaitiiti, ma ua faalauteleina atu le Polokalame Fesoasoani mo Pili Aoga i Tausaga 9 e oo i le Tausaga 11 o aoaoga maualuga.
E ui i nei taumafaiga lelei, o loo taofiofia lava le auai o tamaiti i aoaoga ona o isi tau e lē iloagofie, ma le faateleina pea o le aofai o tamaiti e faamaamulu mai aoaoga”.
“O se mataupu na lāgā soo e i latou na auai i le Suesuega faapea tamaiti, o tamaiti ia e feoai solo i le auala e faatau atu oloa. O le faafaigaluegaina o tamaiti e tele ina mafua mai i tulaga maaleale o le lē tagolima.
O le Fuaiupu 32 o le Feagaiga i Aiā Tatau a le Tamaitiiti, o loo iai le aiā tatau a le tamaitiiti e puipuia ai mai le faaaogāina e saili ai le tamaoaiga, ae aafia ai ana aoaoga. Afai ua lē mafai ona aooga tamaiti ona ua faamalosia e o latou aiga e faatau atu oloa, ua faapena foi ona leai so latou avanoa e faaleleia ai o latou olaga mo le lumanai, ma faaauau ai pea le taamilosaga o le mativa”.
“E mamafa le avega o lagona ma le avega faalemafaufau e tauave e tamaiti, pe afai ua palasi iā i latou le matafaioi o le sailiga o tupe e ola ai o latou aiga – o isi taimi, na o latou lava e maua ai tupe a le aiga.”
O le a faaauau pea ona avea lenei mataupu o se luitau tele, vaganā ua lōtea e le mālō le matā’upu lautele atu o le mativa ma le lē tagolima ma vaganā ua mafai ona filifili e aiga le aooga o tamaiti ae lē o le ō e faatau atu oloa”.
“E sili atu i le tasivaetolu (34%) o i latou na aofia i le suesuega na molimauina le sauaina o se tamaitiiti i totonu o le aiga, i le tausaga ua tuanai atu. Peitai, e mafai ona maualuga atu lea fuainumera talu ai, o le tele o i latou na auai mai nuu, e leai so latou manatu o le soona faatonu o tamaiti o se tulaga o le sauaina”.
“O talanoaga i vaega patino i feutagaiga i nuu, sa masani ona talanoaina e sui auai le aiā tatau a mātua e faatonu ai tamaiti i le sasa i soo se auala latou te filifilia auā o se auala aogā lea ua augatupulagā ona faaaogāina e faatonu ma aoai ai tamaiti.
E tosina tele le faatonuga ma le tausiga o tamaiti i Samoa e lana aganuu ma faatinoga ma talitonuga Kerisiano. O le masani i Samoa o le faatonu o le tamaitiiti i le sasa poo le po, ua faigata ai ona iloa le eseesega o le faatonu, ma le sauaina. E masani ona talia e tamaiti ma mātua le soona sasa, ma le lē iloa, ua oo atu i le sauaina”.
“E tāua le saga faamanatu ma faailoa atu, e lē o aveesea i le Feagaiga i Aiā Tatau a le Tamaitiiti le aiā tatau a mātua e faatonu ai a latou fanau. Peitai, e lē talia se ituaiga faatonu e aofia ai le sauaina.
E ui ina e lē o ma‘oti i le Feagaiga i Aiā Tatau a le Tamaitiiti ituaiga faasalaga talafeagai e faaaogā e mātua, o loo manino i le Komiti mo Aiā Tatau a le Tamaitiiti, e lē tatau i mātua ona faatino ni sauaga poo le faatonu e faamaasiasi ai, ina ia puipuia le tamaitiiti mai ituaiga sauaga uma o le tino ma le mafaufau.
O loo taatia mai i tulafono a le atunuu le faamatalaina o faasalaga ua sopo atu ma le faatonu po ua faauigaina o sauaga”. “E tatau i tulafono a le atunuu ona faataatia ni taiala o faatonuga poo faasalaga e talafeagai ma faatonuga poo faasalaga ua lē talafeagai, ina ia manino le eseesega o le faatonu ma le sauaina.
E talitonu le Ofisa, o se faasalaga soona faatino ma afaina ai tamaiti, e tatau ona ta‘ua ua sopo atu ma le talafeagai ma ua avea o le sauaina, ma e tatau ona faamatalaina i tulafono a le atunuu, o se faasalaga lē talafeagai”.
“O faiga aiga faatautala ma le mataifale o ni amioga e ta‘usolitulafonoina i tulafono o aiātatau a tagata soifua faapea tulafono a le atunuu. E faapea foi ona matuā lē taliaina i le aganuu a Samoa.
Auā foi ua aliali mai ai ua lē toe iai le maopoopoga o aiga e faatino la latou matafaioi tauave faatasi a – tina; tamā; uso, tuagane ma tuafāfine o mātua; mātua o mātua; ma isi tagata o le aiga – e puipui ma mautinoa le saogalemu o tamaiti”.
“E ui ina faasāina e tulafono ma le aganuu, o se tasi lenei o faafitauli o loo faaauau pea, ma o le popolega o le Ofisa mo Aiā Tatau a Tagata Soifua, e foliga mai o loo faateleina, aemaise lava, e laiitiiti faamaumauga o loo maua i uiga, le taatele, ma mafuaaga”.
“O le itu foi i faamaumauga, e mafai ona faapea, e na o se vaega itiiti o faiga mataifale o loo lipotiina ona e lē gata i le tulaga tapui o lenei mataupu ae o le fefe ma le maasiasi o lē na faatino i ai nei faiga.
E tāua tele i Samoa le tauleleia o le igoa o le aiga lautele, ma o se itu lea e iai se sao i le lē lipotiina o nei faiga, ma faapea ai ona lē gagana le tamaitiiti, ma lilo ai le solitulafono a le tagata matua.
Na aliali mai foi i le Suesuega, e lē iloa e tamaiti poo fea e lipoti i ai sauaga i tamaiti poo le mataifale. Ma e foliga mai ai, e lē o iai se iloa o tulafono ua iai nei mo le puipuiga ma le lagolagoina o i latou e aafia”.
