“E lē o a‘u, E lē o so‘u manatu foi. O le Atua e ona le feau, faatasi ai ma le manaoga o Samani Pulepule e faailoa atu.”…Onesemo Pulepule
Ua teena e le komiti o le Matagluega a Niu Sila o le Ekalesia Faapotopotoga a le Atua, poo le Assembly of God, le feau ma le galuega sa momoli fofogaina e le Taitai o Ausetalia, le susuga ia Onesemo Pulepule.
O le galuega a Onesemo sa fai o le alu atu lea i le komiti a Niu Sila, o lona tamā, Samani Pulepule o le a faasee ese ma malolo mai ona tofiga Taitai e pei ona ia tauaveina.
O le feau lava lea e tasi sa muai faailoa e Onesemo, i la latou feiloaiga ma le aulotu a le toeaina i Aukilani, 107 Stoddard Rd i Mt Roskill i le tolu vaiaso talu ai.
Na mafua ona faia e Onesemo lea tulaga, ona o le manao malo, ma le vaai alofa i le galuega a le Atua, aemaise ai o le faatinoina o le manaoga o lona tuaa sa faaleo ane a o maua lona malosi.
O le saunoaga a Onesemo sa ia ta‘ua ai o se manaoga ua leva ona faailoa ane ia te ia a o malosi le toeaina. Sa faailoa manino i le faaaliga a le Faifeau e faapea, sa saunoa ane lava Samani ia te ia, i upu e faapea, Ua faailoa mai e le Atua ua tatau ona ou Step Down mai le galuega.
Na toe taliu le faifeau i Ausetalia, ina ua mae‘a ona feiloai ma le aulotu, sa feiloai foi ma le Sui Taitai a Niu Sila le susuga ia Motu Matia, ina ia saga manino atili ma le tatau ai ona silafia foi e le komiti a Niu Sila lea faatatau.
Peitai o le fonotaga a Niu Sila lava ia, sa faataunuuina i le faaiuga o le vaiaso o le Eseta, sa faailoa ai se faaiuga a le komiti e faapea, e lē taliaina le savali a Onesemo, ae o le a faaauau pea ona avea Samani ma Taitai o Niu Sila.
E tusa ai ma lipoti sa oo mai i le Samoa Times e faapea, na saunoa se tasi o le komiti ma ta‘ua ai, “E leai se feau a Onesemo o le Taitai o Ausetalia, e aiāina ai faaiuga a Niu Sila. E fai lava e Niu Sila ana faaiuga ma ana fuafuaga.”
O le faaiuga la lea ua taoto ai ma ua nofo foi i loto ma finagalo o le aufaigaluega, ma tagata lotu i le lalolagi atoa. E pei ona silafia o Samani o le Taitai o Niu Sila, a o ia foi o le Taitai o le lalolagi atoa i le galuega Samoa lava ia.
E lei logo mālie le faaiuga a le komiti ona e lē gata i saunoaga sa faalele, ae ua taligata foi e nisi talu ai le salalau ma le televave o faamatalaga ua puaina i le ala, ma luga o upega o fesootaiga.
O faamatalga sa maua e le Samoa Times e faapea, sa tuumalie ma filemu le feiloaiga a Onesemo ma le susuga i le Sui Taitai o Niu Sila. Na tuua foi e Onesemo Niu Sila ma lona talitonuga o le a silasila faaleagaga le komiti i le mataupu ma ona tulaga lelei mo le lumanai.
Ae ui i lea, ua lē o lea le faamoemoe ina ua toe liuliu le tofa ma finagalo o le komiti, ma faamautu ai la latou faaiuga e pei ona fofogaina.
O le feteenai o faamatalaga muamua ma le mulimuli, ua avea ma pogai o le nenefu ai o finagalo ma manatu o le toatele o tagata lotu, ma le aufaafofoga. Ae lē gata i lea, ae ua matuā faateleina ai ma le anoano o fesili e manaomia ona tali i se auala manino ma le malamalama lelei. O le ala lea sa toe tapā ai lava le komiti mo so latou finagalo. O le faaiuga o le vaiaso talu ai sa feiloai atu ai i le susuga i le Sui Taitai o le galuega a Niu Sila, le susuga ia Motu Matia, i lona maota i Magele.
Samoa Times: O le ā se tofa mamao o iai i le komiti, ua lē talia ai le finagalo o le toeaina e pei ona fofogaina e Onesemo le Taitai o Ausetalia? Ua mautinoa lava ua le o toe malamalama le toeaina, ma ua lē toe tautala mai ona o le tulaga i le gasegase.
O le ā se silasila mamao a le komiti, e faapefea ona fai le galuega, ma Taitai pea Samani ae e lē o toe natia le tulaga mafatia o loo feagai ma ia? E lē o iai se aiaiga i tulafono a le Matagaluega a Niu Sila, e faatulagaina ai ituaiga mataupu faapea ma taimi e ono tulai mai ai?
Sui Taitai: O le mea lava ua mae‘a ona e lomia i le nusipepa, o le mea lava lena ua iai, o tali uma lava o fesili na ua i totonu o lau tusitusiga muamua. O loo taulai pea le silasila a le komiti i le tele o galuega sa tu malosi ai le toeaina.
O loo iai pea lava foi le naunautaiga i le komiti, e faaauau pea e Samani ona tofiga Taitai e pei ona iai. E lei mamao atu foi le galuega tele sa feagai ai ma le toeaina e pei ona iai mea sa tutupu mai i le galuega aoao i Niu Sila.
O le finau lava le taumafai malosi o le toeaina sa fai ai, lea ua iu manuia. E leai la se isi a matou tala, o le faaiuga lava lea ua iai. E leai foi se aiaiga a le Matagaluega i tulaga faapea, e pei ona iai le gasegase o Samani. Na pau le tulaga o loo iai nei, o loo sauni la matou feiloaiga ma le aulotu a le toeaina i Aukilani. Masalo o le a maua ai se isi tala.
E tele fesili sa tuuina i le Sui Taitai, peitai sa faailoa aoao tetele pea lona finagalo, ma ua faamaonia ai, e leai se isi fuafuaga mamao a le komiti, e fatatau i le tulaga mafatia o loo feagai ma Samani, ma ua alagatatau ai ona malolo mai ona tiute, e pei ona saunoa i ai le Taitai o Ausetalia.
O le afiafi lava o le Aso Sa ananafi, aso muamua o Me, sa maua ai se talanoaga i luga o le telefoni ma le susuga i le Taitai aoao o Ausetalia, Onesemo Pulepule. Sa toe tapā i sona finagalo, ona e foliga mai ua lē tau lau, ma ua teena e Niu Sila, le finagalo faatamalii, faale-Atua sa ia momoli i ai. O le saunoaga tuusa‘o lenei a Onesemo mai Melepone Ausetalia i le talanoaga i le telefoni.
Onesemo Pulepule (Taitai o Ausetalia)
“O le tausaga na te‘a nei na ou alu atu ai, ma talanoa ma le toeaina ia Samani, si o‘u tamā.
“O lana tala lea sa fai mai, Ua faailoa mai e le Atua, ou te step down ma le galuega. Ua ou iloa foi ua ou ma‘i ma ua lē lava foi le malosi o le tino. O upu lava ia na saunoa mai ai le toeaina.
“Sa ou fai i ai, ua manaia foi lena, ma ua tatau ona faatino loa ma faataunuu lena fuafuaga. Sa ou toe taliu mai i lena tausaga, ma ou faatali poo afea e toe valaau mai ai le toeaina mo le faataunuuina o le fuafuaga. O la‘u malaga lea na ou toe faanatinati atu ai a o lumanai le Eseta, sa ou vaai ai ma le alofa i si o‘u tamā, ou te foi mai lava, ou te lei iloa pe na ia iloa a‘u. E ataata mai lava, a o se malamalama i se tala ua leai.
“O lona tino o loo malosi pea, peitai o lona mafaufau, ua lē o toe tutusa, o le ala lea ua lē mafai ai foi ona toe tautala mai, ma ua faigata foi ona toe malamalama i se mea. Ou te alofa la i le toeaina, ona ua tuai ona faatino lona manaoga, peitai o le taimi lava lea na ou iai iinā, sa ou iloa ai mai le Atua, o le taimi tonu lea e faataunuu ai ma fai loa le mea na manao ai, Ua tatau ona malolo mai loa i ona tofiga. O le ala tonu lava lea sa ou faia ai loa ma faataunuu le faaiuga e pei ona ta‘ua muamua. Ua tatau ona malolo le toeaina. E lē o a‘u la, o le finagalo o le Atua, ma le manaoga o Samani sa faaleo mai a o malosi.
“O le mea faigata la lea ua iai, ona e pei ona ou fai atu, ua lē toe malamalama, lē toe tautala, ma ua tuai foi ona faatino lona manao, e ala i le saunoa tuusa‘o mai a o faafofoga atu i ai isi.
“Ia te au foi ia, ou te lei alu atu e taitai mai finagalo, ma ou aiā fua i faaiuga a Niu Sila. E sa‘o lava latou, o lea foi ua ou maua tala i le latou fonotaga sa faia, ma le teena o le mataupu sa ou taumafai atu i ai.
“E lē o sa‘u pisinisi la lena, o le latou lava faaiuga lena, na pau la‘u pisinisi, o le tau atu i ai o le finagalo o le Atua, ma le mea sa manao ai Samani uma. Ae pule lava Niu Sila ia latou faaiuga, ma o le tulaga foi na ou talanoa atu i ai, e faaleagaga e lē faaletino. “O a matou fonotaga foi a Taitai o le lalolagi e fai, ua leai se leo o Niu Sila, ua lē toe lagona Niu Sila, ona e lē o toe tautala mai le toeaina (Samani). A leai la se leo o Niu Sila, e lē taofia ai fua le alu o le galuega latou.
“O le isi lea uiga sa manatu ai ua tatau ona faataunuu le fuafuaga. “Aua le vaai ia Samani, ae vaai i le galuega a le Atua, aua ne‘i taofia e se isi. Ou te alofa foi a‘u i lo‘u tamā, auā e lē mafai na aumai e na o le nofonofo i lona nofoa, ae fai a matou fono, e fetaui la lena ituaiga vaaiga. Afai lava la e manao Niu Sila e toso mai le nofoa faataavalevale o le toeaina i taimi o fonotaga a le lalolagi, e pule lava latou. E leai so‘u popole i le faaiuga a Niu Sila e pei ona faailoa, auā e pei ona ou fai atu, e lē o a‘u e ona le feau, o le Atua ma le manaoga o Samani.
“O le tala foi lea e tasi sa fai i le aulotu a le toeaina i Aukilani, o le feau lava e tasi, saili se latou Faifeau. O le toeaina o le a malolo mai le galuega, ua oo i le taimi e faagaioi ai le lotu, aua ne‘i taofia. E tatau foi ona malamalama tagata, o le alofa moni le release o le toeaina.
“E mafai a ona faatino le alofa faaletino, ae tatau ona silasila i le Atua e ona le galuega, ae lē o Samani, o upu tuusa‘o e lē fealofaia, ona o le feau lava na aumai e tatau ona ta‘u sa‘o e lē faaaloaloa.
“E tele nisi saunoaga matagofie sa saunoa i ai le susuga ia Onesemo. O lona naunautaiga lava ia faaalu ma gaioi aua le taofia le galuega ona o le toeaina. O Samani lava ia ua lē mafai ona tautala mai, ua lē o toe malamalama foi, ae tuu pea lava i le faaiuga a Niu Sila le mataupu.
“O Setema e faamoemoe e fai atu ai le isi fonotaga a Taitai i Niu Sila, ma o le a talanoaina ai le mataupu lenei e uiga i le Taitai o Niu Sila. Afai lava o le ā se finagalo o Taitai o le lalolagi, ma afea ai ua tatau ona faamalolo le toeaina, o lona uiga o le faaiuga ma le tali lena o le tautua ma le soifua galue o Samani i ona tofiga.”
O upu mulimuli a le auauna, sa ia ta‘ua ai o loo tatalo pea i le Atua, ina ia faamalamalama atili le mataupu i finagalo ma loto, ina ia maua le filemu moni, ma ia faia pea lona finagalo, ae lē o loto o tagata.
O loo tālia nei le feiloaiga a le komiti ma le aulotu a le toeaina i Aukilani, o le a faia i se taimi lata mai. Ae o le maitau ma se vaavaai faanenefu i ai i le mataupu lenei, afai ae tasi le tofa saili i finagalo ina ia malolo le toeaina ia Samani, ae saili so latou Faifeau, o lona uiga o le iuga lea o lea mataupu. A sui se Faifeau a Aukilani, o le a suia ai foi ma se Taitai o Niu Sila, sui atu ai ma le Taitai o le lalolagi.
Ona o le faavae o le Ekalesia o loo manino ai, e lē mafai ona toe nofoia le nofoa e le Taitaifono, pe a leai se tofiga Faifeau. O le malolo o le tofi Faifeau, o le a malolo ai foi ma tofiga Taitai ma nisi tofiga aloaia o le Ekalesia.
Ae afai foi o le a faatumauina pea Samani ma Faifeau o Aukilani, o lona uiga o le a tālia le fonotaga a Taitai o le lalolagi ia Setema o le tausaga nei lava, mo sa latou faaiuga i le toeaina.
Mo le silafia pea, ua mafua ia tulaga uma, ona o le matua o le soifua o Samani ua iai nei, faapea ai ma le tulaga tigaina ma le faigata o gasegase o le tino o loo feagai mai ia.
O le a tulituliloa le feiloaiga a le komiti a Niu Sila ma le aulotu i Aukilani, pe o le ā se faaiuga o le a tulai mai.
E tusa ai ma faamatalaga sa maua e faapea, e lei faapumoomooina e Onesemo ona fai lana galuega taumomoli, ma lona talitonuga o se faaiuga ua matuā talafeagai, ma ua tusa foi ma le finagalo o le Atua i lenei vaitaimi. O lipoti e faapea, sa muai faia se talanoaga faalotoifale a le aiga, e aofia ai le tina o le galuega le faletua ia Sapapalii Pulepule, ma alo tamaitai e toalua, o Sera ma Talalelei, faapea ai Onesemo, ma faailoa i ai le feau lava e tasi e uiga i le faataunuuina o le manaoga o le toeaina poo le tamā.
