Fetaui faaaliga faifaatoaga a Savaii ma le palolo

O le a tumutumu le maketi i Salelologa i lenei vaiaso i le faaaliga a le au faifaatoaga i Salafai lea o le a avea ma autu o lenei tausaga, auā o le faaaliga a faifaatoaga i Upolu i le masina o Setema na faia tonu lava i le vaiaso o loo faagasolo le fono a atunuu laiti tau atiae o le lalolagi. Ua fetaui lenei faamoemoe o le Matagaluega o Faatoaga ma Faigafaiva ma le taaga muamua o le palolo o lenei tausaga, lea o le a asi i le asiga muamua i le Aso Lua, 14 o Oketopa ma le asiga mulimuli i le Aso Lulu 15 o Oketopa 2014.

Faaalia e le ofisa o faigafaiva ua mae‘a se latou sailiiliga i le palolo ma o le a tetele, peitai e ese lava le vaai faasaienisi, ese foi le tau faasamoa e iloa ai le tetele, feololo pe leai se palolo e maua. O le tumutumu ai la o Salelologa i le faaaliga a le aufaifaatoaga i Savaii e manatu nisi, o le a lē maua ai ni ofu palolo i ni tau lelei auā o le tumutumu lea o tagata mai Upolu mo le faaaliga aemaise o le aufaigaluega ma sui o le Malo o le a oso maualuga ai ma tau o ofu palolo.

O le a luu tupe ai foi le au faatau palolo auā e tiga lava ona taugata ae o le a faatau lava e i latou e tele tupe, auā o le taimi foi lea o le a faia ai faamomoli mo nai aiga i fafo, ae lē faitaulia tagata e la‘uina i fafo le palolo e faatau ai ona e sili ona lelei le seleni e maua ai.

O faiga nei e manatu nisi ua mafua ai ona lē manuia nisi tausaga pe a laitiiti pe leai foi se palolo e maua. O le masina lenei e tetele ai i Savaii e pei ona talitonu pea i ai le toatele o le atunuu e masani i le palolo, peitai o nisi tausaga ua mavae, sa tetele i Upolu i le masina lenei, ae faaleai Savaii. O le taaga mulimuli foi ia Novema e faapea o le masina lea o Upolu, ae sa tetele ai Savaii.

Ua faaalia e le ofisa o faigafaiva, o le faaleagaina o amu e fanafanau ai le palolo i le taimi e taina ai, le isi mafuaaga o le lē maua o le i‘a ma e faavae ia mau i faamaumauga sa faia ina ua tuanai afā o Ofa ma Valelia ma isi afā na mulimuli mai ai.

O le matai‘ai lenei a Samoa sa feiloai ai aiga ma uo i aso ua mavae, auā e ta loa le palolo, alu ma moliga palolo. O aso nei a toe iai ni moliga palolo ua na o se tasi pe lua ni ofu, ae o isi ofu uma ua faatau.

O le vaitaimi foi lenei o nisi ua lē agai e ta palolo i le sami, ae ua ta palolo i le afe i maota o faifeau i nuu e ta ai le i‘a, ona faatagā faapea lea na alu atu e fia feiloai poo ā mai le faafeagaiga ma le galuega, ae faamuliga lava o le fia tausami palolo, auā o maota lava o faifeau e lē misi ma le oo i ai o le tufaga palolo. Talosia ae tatou maua se palolo o lenei tausaga.
Toe manatua i le ata, ofu palolo o le a vaaia foi i le maketi i Salelologa ma Fugalei i lenei vaiaso, ma ni tau o le a felelei a‘e i le lagi - photo: Getty images