O ni nai vaiaso ua tuanai o le masina o Ianuari na fesagai ai nisi o aiga o faafeagaiga o le ekalesia Aso Fitu koneferenisi ma a latou aulotu fou, e pei ona iai le susuga i le faafeagaiga ia Pr Ietitaia ma Alofa Ah Siu, Pr Samuelu ma Emma Afamasaga, Pr Andrew Feaveai ma le faletua.
Peitai o le Aso Sapati aso 1 o Fepuari na atofaina ai se laolao e feiloai ai aiga uma o le susuga ia Pr Tusitina ma le faletua ia Lata ma a la ekalesia e 3 – Scarbrough, North Central ma Deception Bay.
O le susuga ia Pr Aitui ma Jacinta Fanene ua siitia atu nei i Melepone ae ua see mai foi le sa o le susuga ia Pr Toetu ma le faletua e tausia le isi ekalesia.
Na muai sii mea i Matautu Sa e ala i le sauniga masani o le lesona ma se upu faalaeiau e pei ona uluuluamatafolau ai se feau i le faatāuaina o le uulima faatasi ma fealofani le fanau a Keriso.
Na mae‘a paelago le taulaga siitia ona alo lea o le aofia i se taumafataga sa maamaau i ai le paia i ekalesia.
O le fofoga o Samoatā Minute sa fetalai e fai ma sui o le ekalesia a le SDA Deception Bay e tu tootoo ae o le tautalaga ia Faiumu Alapati Tamala Paulo mai Sini sa feagai ma le faaleoina o se taulaga a le faafeagaiga ma le faletua i le paia i Ekalesia.
O le susuga i le toeaina ia Lagaaia Iona sa fai ma sui o le ekalesia a le SDA North Central.
O le susuga ia Pr Tusitina Faiumu o se lupe faalele mai Taga Savaii faapea le faletua ia Lata Faiumu mai Safa‘i i Savaii.
