Ua tele tala ma faitioga ua faia faasaga i le tupulaga mai i Vaitele.
O se faafitauli tele ua saunoa foi i ai taitai o lea itu o le Atu Faleata ona o le toateleo tupulaga ua aafia i soligatulafono.
O le tulaga faigata o le afioaga o Vaitele, ona o le tele o le nofoaga lenei ua faamautu ai tagata ua faatau fanua umia saoloto.
O le tele o le pitonuu na uta, e leai se leo o le pulega a alii ma faipule e oo i ai ona e lē o ni tagata o le nuu mavae.
O lea la ua tulai mai le afioaga lava ia i le pitonuu a tai le nuu mavae lea, e faatino ni polokalame ma ua tatala mo tupulaga uma o Vaitele i le nuu atoa ai le nofoaga o fanua umia saoloto.
O se komiti ua aofia ai sui eseese o le afioaga o Vaitele ua faaigoaina o le “Onosai ma le Loto Maualalo”, o lenei komiti ua galulue nei i le sailiga ma le faatautaia o polokalame ina ia mafai ai ona valaaulia le tupulaga e auai ai.
O aoaoga i le tomai faaleaganuu – poo polokalame e faaleleia ai tu ma aga faa-Samoa ua faatautaia i afiafi o Aso Gafua taitasi.
Ua faapea foi ona saili le komiti i seleni ina ia faatautaia ai polokalame mo atina‘e i galuega taulima e mafai ona aoaoina ai le tupulaga e lē o iai ni galuega.
O le faamoemoe ina ia maua le mafutaga i tupulaga, ia maua le tomai e iloa ai le va fealoai aemaise i le va o tupulaga ma tagata matutua ma ia iai le tomai i nisi o auala e saili ai galuega.
O le mafuaaga lea o le feiloaiga ma le alii faipule o le Itumalo o Aleipata Itupa i Lalo, le Minisita Lagolago foi lea o le Matagaluega a le Palemia ma le Kapeneta, le Afioga Tafua Maluelue Tafua.
O le sailiga seleni a le Komiti na talosagaina ai le alii Minisita Lagolago mo se seleni. “Ou te fiafia tele i le mafuaaga o le latou sailiga tupe, o polokalame nei e lagolago i taumafaiga a le Malo ina ia unai ma atina‘e tupulaga aemaise lava i Vaitele,” o le faamatalaga lea a le afioga Tafua Maluelue.
“O sailigatupe ia e tatau ona lagolagosua i ai le atunuu”.
E lei manao le alii Minisita lagolago e faalauiloa le aofai o le siaki na ia tauaao atu ae na mautinoa e lelei le aofai i foliga fiafia o le komiti i le taimi na taulimaina ai lea fesoasoani.
Ua mae‘a foi ona saunoa le afioga i le Faipule o Faleata i Sisifo, le Afioga Lealailepule Rimoni Aiafi ua iai se fuafuaga e fausia se maota tele mo tupulaga o le afioaga.
O le faatuputupulaia pea o le tulai mai o faafitauli ua aafia ai tupulaga o Vaitele lea ua mafua ai le agai o ona taitai ina ia faatino ni galuega e foia ai le tulai mai pea o faafitauli i lea afioaga.
E lē o faamalosia foi tupulaga o loo nonofo i fanua umia saoloto ae o fanau lava ia a Vaitele-tai o loo i totonu o le faiganuu o i latou ia ua faapea ona agai i ai le afioaga e faamalosia le iai i totonu o polokalame atia‘e nei.
O le faafetai a le Komiti o le “Onosai ma le Loto Maualalo” ona o le amanaia o le latou taumafaiga e taitai o le atunuu e aofia ai le alii Minisita Lagolago, le Afioga Tafua Maluelue.
