Ole aoga lenei ole New Zealand Institute of Technical Training oloo iai nei lona ofisa autu i Manukau, ma ua latalata ile 20 tausaga talu ona iai lana tautua ile komuniti auā fanau aoga mai le atu Asia faapea foi ma tagata Pasifika.
O lenei aoga sa faavaeina ele alii mai Bunjab i Initia e suafa ia Kulbir Singh ma o ia foi oloo faauluulu iai le aoga. Ile ta‘ua ole New Zealand Institute of Technical, i totonu o Aotearoa ona o lea ua mafai ona amata malaga mai ai nisi o alo ma fanau o Samoa, ma aoaoina ai i totonu o lenei aoga ma ua faamanuiaina ai ise pemita aoga faatasi ai ma se pemita e ono ausia ai le mafai ona faigaluega ile 20 itula ile vaiaso.
O lona uiga ose avanoa lelei lenei faaauro ma e ēe aumaua foi e nei fanau aoga nei avanoa e lua e ono ausia ai nei faamanuiaga auā manuia o aiga ma le luamanai ole tamatiti lava ia.
Ole Aso Faraile ua mavae 3 o Mati na faataunuuina ai le Alumni Conference a lea aoga i lona lala fou e lei leva ona tatala ile 155 Queen St ile City ma sa molimauina ai le fetuleni atu o tagata mai Asia ae sili ai o lea ua felanulanuai le aoga i tagata Pasifika aemaise lava ia Samoa e molimauina lea koneferenisi.
E matagofie ma feilafi tautinoga ma molimau a fanau sa faauu ma faamanuiaina i lenei aoga ae sili ai oloo filofilo ai ma se alo o Samoa i nei tautinoga le tamaitai ia Julie Matua mai le afioaga o Salamumu ma Tiavea, ose alo e faasino ile susuga ile faafeagaiga ia Rev Taeao ma le faletua ia Sela Matua, ma ua lagona ai le agaga faafetai ma faageetia ona oloo iai ni alo o Samoa o lea ua mafai ona ausia ia tulaga maualuluga o aoaoga i totonu ole New Zealand Institute of Technical Training.
Ole faletua ia Alaifaiva Lemoe Futi oloo galue nei ose volunteer i totonu o lenei aoga, ma e lē o toe mamao ona galue tumau lea ina ia avea o ia ose sooupu i totonu ole aoga faapea ma tamaiti aoga Pasifika. Ua ia faailoa le tele ole avanoa e ono maua ai e fanau Samoa e lei nofomau nei faamanuiaga e lua e ono aoga ai e maua ai se pemita aoga ma le pemita faigaluega.
O nisi o tamalii ole atunuu oloo galulue ai i totonu ole New Zealand Institute of Technical Training ole afioga lea ia Savea Egelani Soonalole oloo avea nei ma taiulu ole Academic side ose tagata ua lauiloa i totonu o Aotearoa i lona tomai faaleaoaoga, faapea le susuga ia Patrick Popo Lemalu ua lauiloa i tulaga o musika o lea foi oloo faasoa ai lona tomai i musika i totonu o lenei lava aoga.
E 5 aoga oloo faatuina i Ausetalia ma oloo maua ai foi avanoa mo fanau Samoa ma le Pasifika oloo alala ma papaaao ai i Ausetalia, ae lua oloo iinei i Aotearoa.
Ole sailiili matagi o tatou tagata Samoa auā se manuia o aiga nuu ma ekalesia o lea ua tatala mai ai le faitotoa mo fanau ina ia latou saili ai le poto salalau auā galuega, aemaise ai o pemita aoga ma pemita e saili ai galuega lea ua faasafua mai le alofa ole New Zealand Institute of Technical Training mo tagata Pasifika aemaise lava i tagata Samoa auā o lea ua maua le faamāmā avega i alo ma fanau Samoa oloo galulue ai i totonu.
Ole tele o fanau aoga oloo malaga mai Samoa oloo malaga mai ile pemita aoga ile ono masina ile Level 4, ma oloo mafai foi ona faaauau ma toe faaopoopo le pemita pe a solosolo lelei aoaoga.
O nisi o fanau oloo tapena mai i Samoa ile taimi nei o i latou ia oloo faiaoga ile Kolisi o Samoa ma le Kolisi o Avele lea ua fuafua mai e fia auai foi i lea aoga.
O nisi o avanoa lelei o lea ua maua mo tagata aoga, oloo mafai foi ona aumai uma ele aoga le ulugalii ma le fanau pe afai o lea ua mafai ona malaga mai i Niu Sila nei e aooga ai ile New Zealand Institute of Technical Training.
