Fesoasoani Iapani mo le uafu fou

O le vaiaso lenei ua faamautu ai se fesoasoani tele mai i le Malo o Iapani mo le toe fausia atoa o le uafu tele i Apia. O le tau lea o lea galuega ua fuafua nei e $30 miliona tala Amerika, ma o se galuega o le a amata i lenei tausaga.

O le alii Palemia o Samoa le susuga Tuilaepa Lupesoliai Sailele Malielegaoi atoa ai le sui o le malo o Iapani i Samoa, o Tumaugaoalii Kasumaza Shibuta na sainia i le malologa a le Palemene i le Aso Gafua pepa mo lenei fesoasoani. O le malo o Iapani lea foi na ofo na te fausia le malaevaalele i Faleolo peitai o lea galuega ua tuu atu i le Malo o Saina na te fausia ae o lea la ua alo ane le malo o Iapani e toe fausia atoa le uafu i Apia.

O le uafu lenei o le 97 pasene o uta o loo sau mai i fafo e faatautaia uma lava i le uafu i Apia ma o le manaoga o iai nei ia toe faalautele lea nofoaga auā ua siisii foi le numera o vaa la‘uoloa ma vaa la‘upasese ua afea lenei nofoaga. O le faitotoa o fefaatauaiga e pei ona ta‘ua e le Palemia o Samoa i le sainigalima lenei ma Iapani.

Ta‘ua e le sui o le malo o Iapani i Samoa, Tumaugaoalii e tāua tele le lagolago e Iapani o Samoa ma ona tagata ina ia mautinoa e lelei ana atinae i le agai i luma ma ua lē gata i faleaoga ua fesoasoani mai ai lenei malo ae ua faapea foi i galuega tetele a le atunuu e pei ona iai taligalu o le taulaga o Apia, o le Iunivesite Aoao o Samoa, ma le falemai tele i Tuasivi.

O nisi nei o galuega tetele ua faatino e lea malo ma ona tagata mo Samoa lava ia ma o le faafetai foi lea a le alii Palemia o Samoa ona o le faaauau ona tuu mai o le tau‘au o lenei atunuu i galuega fia faaleleia a Samoa i lea tausaga ma lea tausaga.

E lei faamautu mai se aso e amata ai le galuega ae ua iai le fuafuaga e lei mae‘a le tausaga lenei ua amata ona faatino ma agai atu ai i le tausaga fou.

INFASTRUCTURE-Le-uafu-i-Matautu-tai-i-Apia-(1)