Fesoasoani galuega tetele ia i latou o saili galuega

E lua lava galuega tetele ua ave i konekarate faufale mai Saina latou te faatinoina ia ua ofo mai galuega mo i latou e lē o iai ni galuega i le taimi lenei.

O ia galuega faakamuta ma isi galuega fesoasoani i le fausia o ia fale, ua amata ai i le vaiaso lenei alii talavou ma nisi e iai le tomai faakamuta ae e lē o faigaluega ma e eseese uma lava totogi o loo maua e i latou nei.

O le Qingdao Construction, o le kamupani lea ua manumalo i tauofoga mo le fausia o le faletalimalo o le Sheraton Hotel i Apia. O loo fausia i le nofoaga lea sa iai le faletalimalo o Aggie Grey’s i Vaisigano.
E iai lava le aufaigaluega mai Saina o loo faatinoa le tele o le galuega, ae o galuega tau leipa e pei ona ta‘ua ai ma nisi o loo iai le tomai faakamuta i Samoa e fesoasoani i le au kamuta a Saina. E 60 alii na faamautu o latou avanoa ma faatonuina e agai mai i Vaisigano i le vaiaso lenei e amata loa galuega.

Mo le fanau talavou e lē o iai ma se iloa i se galuega o loo totogi i le $2.50 i le itula. Mo le fanau e leai se tusipasi ae ua galue ma iloa uu le fuatoso o lea e totogi i le $5 i le itula ae o i latou ua sili atu i le lima tausaga o galue faakamuta ma fanau ua i‘u mai i aoga faamatata eseese ma ua maua tusipasi i le faakamuta, e $9 tala i le itula o loo maua.

O le kamupani o le South Pacific Claddings, o se konekarate faufale i Samoa o loo faaaogā le ‘apa lea e ta‘ua o le alucabond, o le kamupani lea ua tapa e le Qingdao ina ia faatino atoa lava le aoina o tagata faigaluega ma faamautu.

O le SPC foi lea o le a ave i ai le tupe e totogi ai le au kamuta mai Samoa lava ia. O le fesootaiga lenei ua mafua ai avanoa faigaluega nei ona o le SPC ua faakonekarate e le Qingdao ina ia maua ai le apa lea o le alucabond mo ana galuega o le faletalimalo ma laga ai loa le sailiga o tagata faigaluega nei.

O loo iai foi se isi galuega lea o loo ua fau foi e se isi konekarate Saina e ta‘ua o le Shanghai Construction ma ua fesootai foi ma le SPC ma ua talosagaina ni avanoa se 30 mo tagata faigaluega Samoa.
O le galuega o loo faatautaia e le Shanghai o le fausia o le malumalu o le Iupeli a le Kolisi faafaifeau i Malua. O le faamatalaga a le SPC o le a vaavaai i le atu Tuamasaga ina ia ao mai ai tupulaga e lē o faigaluega ina ia maua ni galuega i nei konekarate tetele.Nisi o fausaga tetele ua maua ai nei galuega a nisi o loo tau saili ni galuega

Nisi o fausaga tetele ua maua ai nei galuega a nisi o loo tau saili ni galuega