O le galuega o loo feagai ma le vaaleoleo o le Nafanua o le leoina o ogasami faatulafonoina o Samoa e lē o atoatoa ona maua ai vaafagota mai fafo o loo fagogota faasolitulafono io tatou ogasami. E ui foi o loo iai masini faaonapo nei i luga o le vaaleoleo e mataitu ai ni gaioiga solitulafono i ia ogasami loloto o le atunuu ae peitai e lē o mafai ona mataitu uma ai ia gaioiga.
O lea la ua fesoasoani le Malo o Ausetalia i lea galuega tāua ua aumai ai se vaalele laititi e mafai ona malaga ai ni leoleo ma sui o ofisa faigafaiva a le Pasefika e suesue ni faiga solitulafono faapea. O le vaiaso ua mavae na tulaueleele ai i Samoa lea vaalele mo lana malaga muamua e faata’ita’i ai le faia o ia suesuega.
O le tāua tele o lea fesoasoani a Ausetalia auā e le gata o Samoa ae o isi atunuu o le Pasefika o loo iai o latou vaaleoleo o le gataifale o le a fesoasoani iai lea vaalele ia latou suesuega. O le vaiaso ua mavae na fono ai Minisita o faigafaiva a le Pasefika i le atu Kuki ma sa pasia ai nisi o iuga fono mo le faaaogāina o lea vaalele.
Ua ioe minisita e tatau i atunuu o le Pasefika ona pasia ni tulafono e mafai ai ona faaaogā le vaalele i suesuega oo latou gataifale ma ogasami faatulafonoina, ina ia mafai ona tulaueleele le vaalele i soo se atunuu e aunoa ma ni tulaga e saisaitia ai i tulafono o vaalele sivili.
Na faaalia e le Komesina o leoleo le afioga Fuiavailili Egon Keil, o se fesoasoani tāua tele auā o le a mafai ona vave ai ni suesuega ma maua lelei molimau e faatino ai ni solitulafono faasaga i ni vaafagota mai isi atunuu o loo latou fagotaina faasolitulafono ogasami o le Pasefika.
O vaafagota tetele o loo ilitata iai atunuu laiti ona o vaafagota ia o loo faaaogāina ituaiga o upega tetele e le gata ina maua ai I’a o le tuna ae mamate ai ma isi I’a e pei o laumei ma malie ae e le faaaogāina.
O loo faamatauina foi ogasami o atunuu laiti o le Pasefika i gaioiga faasolitulafono o loo faia e vaafagota e leai ni laisene e fagogota ai io latou ogasami ma ua lamatia ai le maua pea o I’a aemaise le tuna o loo fagotaina ma faatau atu i isi atunuu ma manuia ai tamaoaiga o atunuu tau atia’e o le Pasefika.
