O le alii Loia mai Niu Sila ua mae‘a ona faaulufale i galuega a le faamasinoga i Samoa le susuga Pa‘u Tafaogalupe Mulitalo, ua ofo atu e galue fua mo le aoga mo i latou e iai manaoga faapitoa mo alii ma tamaitai e logonoa, le SENESE, mo le toe lauliliuina o teuteuga o lona faavae ma faamautu agavaa faaletulafono o le SENESE i ona sui auai.
Ua faailoa ai e le pulega o lenei aoga le faafetai ona e lē taugofie le galuega a se loia latou te filifilia e faia lea galuega, ae ua ofo fua mai le tomai faaloia o lea tamafanau a le atunuu e faatino ai lea galuega mo le lua masina.
O le a fesoasoani foi le alii loia e faamalamalama aiaiga o le feagaiga ua talia e Samoa ua faatāua ma puipuia ai aiā tatau o tagata e iai manaoga faapitoa.
Ua faamoemoe le SENESE e faatino se aoaoga mo ona tagata galulue e faamanino atili ai e le alii loia le susuga Pa‘u Tafaogalupe Mulitalo manaoga faaletulafono o fanau aemaise o a latou aiā tatau.
