Ole aumaia ose loia mai Niu Sila e tauave le finauga mo moliaga a leoleo faasaga ile tamaitai faatonu ole ofisa o nafa ma mataupu tau tulafono, ae ose isi foi loia i Niu Sila e finauina moliaga ale ofisa o nafa ma mataupu tau solitulafono faasaga ile Komesina o leoleo, ua fesiligia pe aisea.
Ua faaalia ele Loia sili le afioga Lemalu Herman Retzlaff ise pepa o faasalalauga, ole faia o lea faatatau ina ia mafai ona tutoatasi ma leai se aafiaga faaletagata ose isi ile finauina o nei mataupu i luma ole faamasinoga.
Ua faaalia ele Loia sili ole alii loia le afioga Satiu Simativa Perese, ole a finauina moliaga o Mauga Precious Chang ae ole alii loia le susuga Meredith Conell ose Crown Solicitor i Aukilani ole a finauina moliaga ole Komesina o leoleo le afioga Fuiavailili Egon Keil.
Oloo iai loia sinia i Samoa e tutoatasi ma oloo faia a latou ofisa loia tumaoti, ma ole fesili tele lea pe aisea ua aumai ai ni loia mai fafo e nafa ma moliaga. Ole itu mautinoa e totogi ele Malo loia mai fafo ma e lē o iloa pe fia se vaegatupe ole a faaalu ai.
O moliaga tau taavaleafi oloo molia ai le tamaitai Faatonu ole ofisa o nafa ma soligatulafono ua faaalia ese leoleo sinia oni moliaga e mafai ona finauina e leoleo pe afai e leai se faatuatuaga ole Loia sili i loia ale ofisa o moliaga tau solitulafono le National Prosecution office.
Oloo iai foi loia tutoatasi e mafai ona finauina moliaga a leoleo auā o solitulafono tau taavaleafi. O moliaga foi ole Komesina o leoleo e lē tau aumai ai ni loia mai fafo auā oloo iai loia sinia tutoatasi e mafai ona finauina.
O moliaga ole Komesina oloo finau le loia ale ofisa ole Loia sili e tatau ona faataatia se‘i mae‘a ona suesueina ele faamasinoga le talosaga poo se su a Suitupe Misa faasaga ile Matagaluega o leoleo, le Komesina, male Minisita lea oloo tauaveina ele Loia sili ale Malo.
Peitai oloo finau le loia ale ofisa o mataupu tau solitulafono e mafai lava ona faagasolo le faamasinoga ole Komesina e aunoa male tau faatali ile Su e pei ona finauina ele ofisa ole Loia sili.
Ole toe valaauina o moliaga ole Komesina o leoleo ile Aso Gafua ole vaiaso asau ole a tuuina atu ele Loia sili se talosaga tusitusia e tusa o lea finauga, ona avanoa ai lea ose finauga mai le ofisa oloo nafa ma solitulafono.
E lei tuuina atu se tali a Fuiavailili Egon Keil i moliaga ole tauto pepelo, faia oni amioga lē talafeagai, tuuina atu oni faamatalaga sese, male pueina ose tagata ise auala solitulafono.
