E lē o iloa poo afea e faagasolo ai le suesuega ase Komisi suesue ole a filifilia ele Malo e silasila ile mau faaletonu ile lotoifale ole pulega ole Matagaluega o Leoleo.
Talu mai le faaiuga ale Kapeneta ile masina ua mavae na faamalolo ai le Komesina o Leoleo ona o nisi moliaga faasoilitulafono, ma faamalolo lē tumau atu ai ma se tasi o Komesina lagolago sa avea ma sui Komesina ile taimi na taofia ai le Komesina ma molia.
O lea ua iai se isi faaiuga ale Kapeneta e faamalolo nisi leoleo se toafā e aofia ai se leoleo sinia oloo umia le tulaga faaleoleo ole superintendent. Fai mai se molimau ose faaiuga na faia ele Kapeneta ile vaiaso ua mavae. Na maua se avanoa e talanoa atu ai i lea leoleo sinia o ia sa nafa ma suesuega e fesootai ma moliaga e 259 ole Komesina o Leoleo. Ua faailoa se faanoanoaga ole Malu ole Malo ona ua oo lava ia i latou e lē o iai ni konekarate e pei ole Komesina ma Komesina lagolago, ua oo iai le finagalo ole Kapeneta e faamalolo lē tumau.
“Ua lē iloa poo fea le sa‘o ole tulafono faaleoleo e faatonutonu ai le pulega ole matagaluega, ma le pule lea ua fai mai nei”.
O political appointments poo filifiliga faapolokiki o Ulu o Matagaluega ale Malo, ua filifilia ai le Komesina ma Komesina lagolago.
Ole Kapeneta e faia le faaiuga pe a aafia ia tofiga ini faaletonu e aofia ai ni tuua‘iga oni soligatulafono.
Peitai o leoleo e toafā ua faamalolo, ole suparenitene e lē ose Komesina lagolago, ose alii leoleo taailua, ma ni leoleo se toalua poo ni police constables.
O leoleo ia na faatinoa le tiute ole taofia ole Komesina ile aso na lokaina ai ile potu taofia ina ua faia iai ni moliaga faasolitulafono.
Ole leoleo taailua ua faamalolo lē tumau foi, o ia lea na faia se lipoti ma faailoa ai ile pulega le faatonuina o ia ele Komesina e fana se tagata ina ua faia le osofaiga tau laau faasāina na alu i Faleatiu ile masina o Aokuso ole tausaga nei.
O lea lipoti ale alii leoleo taailua na ave ile vaega o suesuega faalotoifale a leoleo, ma na toe lalaga i luga poo fea o iai ina ua suesueina tuua‘iga faasaga ile Komesina o Leoleo.
“Ua aliali mai nei le tagolima mai ole polokiki e talepe le tutoatasi ole tulafono oloo faamalosia e leoleo e maua ai le fai meatonu”.
Ole lagona faaalia lea ole leoleo sinia ma lona talitonuga e lē tatau ona aafia ni taaviliga o gaioiga faapolokiki ile tuuina atu o moliaga ole Komesina ile faamasinoga.
