“Ua lē iloa poo fea le sa‘o o nei mea, poo ai e afisi a o ai e toso”
O se tamaitai leoleo o loo molimau nisi o leoleo na aveina le taavale pikiapu na aafia i se faalavelave i se vaega o le alatele i Alamagoto i le Aso Faraile, 5 o Setema 2014, ina ua tapunia i le Aso Tofi 4 o Setema le fono a atunuu laiti tauatiae. O le taavale o lona laisene POL-09 e galue i le ofisa o leoleo i Tuanaimato na aafia, ma o loo tu nei i se vaega o le ofisa autu o leoleo i Apia mo le faia o ni galuega e toe faaleleia ai.
O le molimau lea a se alii leoleo ua lē manao e faailoa lona suafa. “Ua lē iloa poo fea le sa‘o o nei mea, poo ai e afisi a o ai e toso”. O le lagona lē fiafia lea o le alii leoleo na talanoa mai i le tusitala, ina ua ia maua le faamatalaga i se lipoti a se tasi o televise ua faailoa ai e le sui Komesina le susuga Fauono Talalelei Tapu e faapea, o le faaletonu o le auala na mafua ai ona tupu le faalavelave. Ua teena foi e lea leoleo le faamatalaga a le sui Komesina e faapea e sese nisi o mau ua ta‘ua ai e lei aafia se avamalosi i le mafuaaga o le faalavelave.
“O loo iai la‘u molimau o se alii o le fuimu na iai i le taimi o le faalavelave. Fai mai o latou na taunuu muamua i le taavale ma latou aveesea mai ai se taga pepa o fagupia sa i totonu o le taavale…E iai foi le leoleo na ia vaaia le taavale lea a le ofisa o afe i le faleoloa o Frankies i Lalovaea ma agai atu ai le tamaitai leoleo na aveina ma faatau mai ai fagupia”.
O le faamatalaga foi a lea leoleo, e lē o le taimi muamua lea o lavea ai se taavale a leoleo i le tamaitai ofisa lava lea, ae e leai lava se faaiuga amiotonu o faia i ai e le Komesina ma le pulega.
O le tagi talatala mai o lagona o lea Malu o le Malo, ona o lona manatu e iai isi leoleo ua faia i ai faaiuga i ni mataupu sa aafia ai, ma o nisi ua faamalolo ae o loo tutupu ma aafia nisi o le aufaigaluega i nisi o mataupu ae leai se faaiuga talafeagai o faia i ai.
“E faapefea ona saunoa le alii sui komesina e leai se avamalosi, o lea e iai molimau na vaai tino i ai”. O le tamaitai leoleo foi na aveina le taavale e faapea mai lea alii leoleo, e nofo i Moamoa ae ua te‘i i le saunoaga a le sui Komesina i le autusitala e faapea o se mataupu na logoina ai leoleo na mafua ai ona agai i ai le taavale i Moamoa ae aafia ai i le faalavelave.
O le molimau a lea alii ofisa e toalua tamaitai leoleo na malaga ai i le pikiapu ma e na o ni manu‘a mitimiti na aafia ai.
