O le Ekalesia Katoliko i lona Ofisa o Aoga lea ua amata ona talanoaina nisi o faitioga ua faapea ona lagalagā e faatatau i le iuga o le suega o le Vasega Valu i Samoa i le tausaga na tea nei.
E manino e toatele tamaiti e lei pasi le tele o mataupu na sueina, ae ua maualuga foi le numera o tama ma teine na faamanuiaina i le pasi uma o a latou mataupu. O le Mataupu o le Numera poo le Matematika lea na ta‘ua e le Ofisa o Aoga a le Ekalesia Katoliko na molimauina ai le tele o le fanau e lei pasi.
“E lē na o fanau foi i totonu o aoga a le Ekalesia Katoliko o loo aafia ai i le iuga o le suega lea,” o se saunoaga lea a A‘eau Chris Hazelman.
O lana faamatalaga ua mae‘a nei ona talanoaina ma o le a tuu atu se finagalo o le Ofisa o Aoaoga a le Ekalesia i le Matagaluega o Aoga, Taaloga ma Aganuu aemaise i le vaega o loo feagai ma le faatinoga ma le tuufaatasia o suega a le Vasega Valu.
O le Vasega Valu lea e saili ai fanau mo avanoa e laasia ai aoaoga Maualuga e pei o Kolisi i totonu o le atunuu.
O le Matematika o le tasi lea o Mataupu e Lua e faalagolago tele i ai le sailiga o aoga e ulufale i ai fanau nei pe a mae‘a le Aoga Laititi poo le Aoga Tulagalua e pei ona silafia ai e le toatele.
“Ona pau le talosaga lea o le a fai i le Matagaluega o Aoga aemaise le aufaisuega o le Matematika, pe iai so latou iloa i le mafuaaga o le maualalo o le numera o i latou na pasi lea mataupu, pe ua maualuga tele le suega ua leiloa ai e le toatele o tamaiti tali fesili, pe e ese vaega o lea mataupu ua seti i ai le su’ega, pe ona pau lava o le vaivai o fanau i lea mataupu,” o se saunoaga lea a le Faatonu Sili o Aoga a le Katoliko.
“O loo tele foi isi pule aoga o loo fesiligia lenei tulaga”.
Na taumafai le tatou ofisa i Samoa nei e fesootai ma i latou o loo feagai ma le faatulagaga o mataupu aoaoina ma suega a le fanau ae na faaalia mai e sui o lea Ofisa e faigata lava ona aumai se faamatalaga a le Matagaluega leaga e lei oo atu se faitioga aloaia a le Ofisa o Aoga a le Katoliko.
“Se‘i vaganā lava ua sau aloaia se tusi, ona faato‘ā vaavaai lea o le Matagaluega i lea mataupu, ae e le mafai lava ona fai atu se faamatalaga i le taimi lenei auā e le aloaia lea faaseā,” o se faamatalaga mai lea a se tamaitai e suafa ia Epe o loo failautusi i le tamaitai o Doreen Roebeck Tuala, lea o loo nafa ma le vaaiga o le vaega o le Matgaluega e tuufaatasia mataupu e aoaoina ma sue ai fanau aoga.
O le tasi lenei o mataupu na laga foi e le Vaega Faaupufai o le Tautua Samoa i se faatalatalanoaga ma le Taitaifono o lea Vaega Faaupufai, Afioga Afualo Dr Wood Salele, e faatatau i nisi o galuega a manuia le Tautua Samoa ma ofi mai i le Malo, o le a matuā iloilo lelei.
O Afualo Dr Wood Salele, e faiaoga i le Iunivesite Aoao o Samoa i Lepapaigalagala.
O lana saunoaga, e tusa ma le to‘a 500 lava tama ma teine aoga ua maua i suesuega a le Iunivesite e uma loa le Vasega 8 ua sauni mo aoga maualuga ae faamaamulu loa ona o le isi mafuaaga ua lē pasi ma ua lē maua ai ni avanoa e ulufale ai i aoga maualuluga se‘i vaganā lava ua faatonu.
“O lea e mua ona o tatou talanoaina le taimi e mae‘a ai aoga maualuluga a le toatele o fanau ma le laititi o le avanoa e mafai ai ona faaauau a latou aoaoga, ae o suesuega nei ua maua mai, e tatau ai ona sui le taulai o le unaiga o aoga a le fanau.
E tatau ona matuā vaai le faaletonu lea e tulai mai i vasega laiti,” o se faaaliga lea a Afualo Dr Wood Salele.
“Ua maualuga foi le laasaga e tatau ona ausia e fanau nei ona faato‘ā maua lea o avanoa i Kolisi a le atunuu ma e tatau lava ona iloilo lelei avanoa nei auā a lē ausia lava e le tamaititi le maualuga e ofi ai i aoga a le Malo ma le Lotu i le maualuga lea, ua leai lava la se isi avanoa e aooga ai fanau nei”.
Ua faamalosia aoga a vasega laiti seia oo i le Vasega Valu, ae o tua atu lea la o loo vaaia ai le faafitauli lenei. Ua talia nei e le Matagaluega o Aoga ni faitioga aloaia e faatatau i le Suega tele lenei faato‘ā mae‘a atu i le faaiuga o le tausaga na tea nei ae toe tasi le vaiaso o malologa a le toatele o fanau ona a‘e loa lea mo le isi tausaga fou o aoaoga.
