Fesili – Na faatumu ma faafoi i le Ofisa o lafoga la‘u lisiti mai le lotu i le vaiaso lona lua o Aperila. Na lafo faatasi ma le lisiti a lo‘u atalii. A o lea ua maua le refund a lo‘u atalii, ae lei maua mai a‘u. Toe maua mai le tusi mai le Ofisa fai mai e faila muamua atu le IR3. Sau faamatalaga i lenei itu?
Tali – Ona o le tulafono e lē mafai ona sili atu le aofai o lau lisiti poo le tupe e te foai i le lotu i lo lou totogi, e lē mafai ona faamaonia e le Ofisa le aofai atoa o lou totogi, se‘i vaganā ua uma ona faila atu lau IR3. O le mafuaaga lena e vave ai ona maua refund a i latou e lē failaina ni a latou lafoga e pei o lou atalii. O le la ua maua uma e le Ofisa faamaumauga o le aofai o totogi o le vaega lea, ua mafai foi ona faamaonia.
Fesili – E te silafia la o le ā se umi e faatali ai la‘u refund?
Tali – E otomeki lava ona faagaoioi e le polokalame a le Ofisa o Lafoga lau refund pe a taunuu atu lau IR3. O loo lapatai mai le Ofisa e faila faatasi atu le IR3 ma le IR526, poo le pepa lea e faatumu ai lisiti mai le lotu ma aoga a le fanau. Ae ona o lena ua uma ona lafo lau lisiti, o le la e faatalitali mai se‘i uma ona faila atu lau IR3.
Fesili – O le ā tonu lava le tulafono mo i matou nei e maua le tupe a tamaiti, poo le Working for Family Tax Credit, ae e iai foi o matou fale nofo totogi poo rental properties?
Tali – Ua iai le suiga fou o le tulafono mo le vaega lenei. E lē toe mafai ona faaaogā investment losses poo le gau a lau rental property, e faamaualalo ai lou totogi, ina ia mafai ai ona maualuga le aofai o le tupe a tamaiti (WFFTC) e maua.
Fesili – Ae faafefea ma‘ua ma lo‘u toalua o loo maua le tupe a le ma fanau. O lo‘u toalua e faigaluega tumau i le Ofisa o Leoleo, a o a‘u e faatamoe mai i lo matou fale la‘u pisinisi suisui. Ua lua nei tausaga e aumai lava le lipoti a le ma Tausi Tusi e gau la‘u pisinisi. Tele tupe alu i lo tupe maua, ona o le taugata o le ie lea ou te faaaogāina mo a‘u suisuiga. Ae ou te fiafia lava i si a‘u galuega ona e pule lava a‘u, toe maua ai foi lo‘u totogi e fai ai a‘u faalavelave ma fesoasoani i le matou aiga?
Tali – E lē lavea oulua i le suiga fou lenei. A tuufaatasi lua totogi ma lou toalua o le a maualalo ona o le gau a lau pisinisi. O le aofaiga atoa lena o lua totogi e faaaogā pe a e fuafua i ai le aofai o le tupe a tamaiti e maua.
Fesili – O le ā le igoa ma le numera o le pepa e faatumu ma saini, ona faafoi lea i le Ofisa o Lafoga e mafai ai ona maua le suiga o lau kamupani LAQC, lea e fia sui i le LTC?
Tali – O le igoa o le pepa o le “Look through company election”. O le numera o le pepa o le IR862.
E mafai ona faatumu e le Faatonu o le kamupani poo se Tausi Tusi. E tusi ai le suafa o le Faatonu ma lana numera lafoga, faapena ma suafa uma o i latou e iai a latou sea i le kamupani ma latou foi numera lafoga. Ona saini lea e i latou uma o loo tusia o latou suafa i luga o le pepa.
Fesili – O afea e faagata ai ona talia e le Ofisa o Lafoga nei pepa?
Tali – Mo kamupani sa LAQC i le tausaga lea na faauma ia Mati 2011, e faagata i le aso 30 Setema 2011. Ae e iai pea le avanoa se‘i oo i le aso 31 o Mati 2013, a o le faalavelave faato‘ā faamamalu lau LTC mai le amataga o Aperila 2012. Ua misi atoa le tausaga lea e faauma ia Mati 2012.
Fesili – E mafai e isi kamupani e leai ni LAQC ona apalai mo le LTC?
Tali – Na o kamupani fou faato‘ā faavae e lei faila muamua ni a latou lafoga e mafai ona apalai. E faagata le taliaina o talosaga a nei kamupani i le aso 31 Mati 2012, pe afai o se kamupani faato‘ā faatu i le tausaga nei.
