O le faleaoga tulagalua o le afioaga o Manunu ua tolu ai galuega tau faleaoga ua faatupe e le Malo o Iapani ua tatalaina i le amataga o lenei tausaga.
E $220,000 le foai a lea Malo na tuuina atu i le komiti o le aoga ina ua talia le latou talosaga mo se fesoasoani.
O se faleaoga matagofie lona fausiaina ona e lē gata ina malosi mo le sauniuni i ni mala faalenatura e pei o mafui‘e ma afā fulifao, ae ua iai foi ma nisi potu faaopoopo mo isi fuafuaga a le aoga.
O le afioga i le Ao Mamalu o le Malo ma lana masiofo sa avea ma malo faaaloalogia a le afioaga i le tatalaina o le faleaoga ona o se tasi lea o nuu o le itumalo o le Anoamaa i Sasa‘e sa lagolagoina le Tama Aiga a o avea ma faipule o le itumalo i le Palemene mo le tele o paeaiga faapalemene a o lei faamavae ina ua ia talia le filifiliga a le Malo i le Sui o le Fono a Sui Tofia, ma taunuu atu ai i le filifiliga e avea ma Ao o le Malo o Samoa. O lana Masiofo Filifilia Tamasese na ave i ai le faaaloalo na te ooti le lipine e tatala aloaia ai le galuega ma ua fetaui lelei le umusaga ma le amatalia o aoaoga a le fanau i Manunu mo lenei tausaga 2015.
O le faleaoga na lamatia lona saogalemu ona ua leaga le tele o vaega ma faia ai loa se talosaga i le Malo o Iapani. O le galuega ua umusa ma tatala o le toe faafouga atoa o le faleaoga peitai o le molimau lava ia, o se faleaoga ua fou atoatoa ona o le tele o vaega na toe tala i lalo ma toe fausia.
Faaalia e le alii Amapasa o le Malo Iapani i Samoa le afioga Tuimaugaoalii Kazumasa Shibuta, o le a faaauau pea ona faatino lea fesoasoani a lona Malo, ona o se isi lea o manulauti o fuafuaga o le atinae a Iapani mo le tausaga e 2012 i le 2016.
O le masina o Ianuari 2015 na umusa ai le faleaoga tulagalua o Matautu ma Vaovai Falealii na faatupe e lea Malo, faapea le Hall ma le faleaoga o le afioaga o Fasitootai. O le tausaga e 1991 na amata osi feagaiga ai lea Malo ma Samoa i le tuuina mai o fesoasoani mo galuega mo le lautele o tagata le grassroot level assistance ma ua toatele faalapotopotoga tuma‘oti ma nuu ua faamanuiaina ai.
O nisi o nuu ma afioaga ua mae‘a ona tauaao i ai siaki tupe mo fesoasoani i le fausia foi o o latou faleaoga o loo faagasolo galuega, ma o se taimi i le lumanai o le a umusa ai foi ma tatala. O Iapani o se paaga faaleuo a Samoa ua silia i le fasefulu tausaga o mafanafana pea o la sootaga faavaomalo.
Na taualuga le umusaga o le faleaoga o Manunu i le taumafataga fealanulanuai ma faaaloaloga mo Malo valaaulia aemaise o taitai o le Malo sa auai aemaise o Minisita o le Kapeneta.
